हवाई दुर्घटना पत्ता लगाउन सरकारले अर्को आयोग बनाउने

संस्कृति,पर्यटन तथा नागरिक उड्डयनमन्त्री बद्रीप्रसाद पाण्डेले समग्र हवाई उड्डयन क्षेत्रको अध्ययनका लागि सरकारले आयोग बनाउन लागेको बताएका छन् ।

एयर डाइनेष्टी हेलिकप्टर दुर्घटनाबारे छलफल गर्न सिंहदरबारमा बसेको संसदीय समितिको बैठकमा उनले सो जानकारी दिएका हुन् । हिजो हेलिकप्टर दुर्घटनामा परी चालक दलका सदस्यसहित ५ जनाको ज्यान गएको थियो । त्यसलगत्तै बसेको क्याबिनेट बैठकले ३ सदस्यीय छानविन आयोग गठन गरेको थियो । 

घटना विशेषको छानविनका लागि सो समिति गठन गरे पनि समग्र हवाई उड्डयनको क्षेत्रमा देखिएको समस्या समाधानका लागि छुट्टै आयोग आवश्यक पर्ने मन्त्री पाण्डेको भनाई छ । प्रधानमन्त्री केपी शर्मा ओली र क्याबिनेट बैठकले मन्त्रालयलाई सो क्षेत्रको समग्र अध्ययनका लागि आयोग नै गठन गर्न निर्देशन दिएको उनले संसदीय समितिलाई जानकारी गराए । 

‘घटनालगत्तै छानविन समिति बन्यो । मन्त्रिपरिषदमा पनि निकै लामो छलफल भयो । र,हामीले सधैं यस्तो आयोग बनाइरहने,आयोगले प्रतिवेदन दिन या त ढिलाई गर्ने या त दिएपछि पनि त्यसको कार्यान्वयनमा नजाने । यो कारणले हामी झन जटिलतामा फस्दै गयौं',मन्त्री पाण्डेले भने, 'त्यसकारण आज यो आयोग बनेको यही घटना विशेषमा आधारित भएर नै छानविन र निचोड, निष्कर्षमा पुग्नेगरी एउटा अध्ययन गर्नेगरी आयोग बन्छ ।'  

गएराति अबेरसम्म प्रधानमन्त्री ओलीले आफू र मन्त्रालयका सचिवसँग सो विषयमा छलफल गरी समग्र समस्या समाधान हुनेगरी आयोग बनाउन निर्देशन दिएको उनले बताए ।