अर्थतन्त्र सुध्रेको सरकारको दाबी, सन्तुष्ट नरहेको निजी क्षेत्रको भनाइ

नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकको अर्थतन्त्रमा सुधार हुन थालेपनि निजी क्षेत्र सन्तृष्ट भएर बस्ने अवस्था नरहेको बताएका छन् । निजी क्षेत्रलाई उकास्न नीति, नियममा थप संशोधन आवश्यक रहेको उनले उल्लेख गरेका छन् । 

अख्तियारलगायत नियामक निकायको भूमिका निजी क्षेत्रमा रहने कि नरहने ? भन्ने विषय प्रष्ट हुनुपर्ने उल्लेख गर्दै अध्यक्ष ढकालले निजी क्षेत्रमाथि अनावश्यक नियमनले लगानीकर्ता निरुत्साहित हुने बताए । उनले भने, ‘हामीले कार्यकाल शुरु गरेलगत्तै अख्तियारले निजी क्षेत्रलाई पनि हेर्ने गरी आएको विधेयकलाई हाम्रो निरन्तर पैरवीले हालसम्म उक्त व्यवस्था संसोधन हुने गरि नै छलफल भइरहेको छ । अब उपसमितिको राय के आउँछ ? यसमा हामी सबै चनाखो हुनुपर्छ । हाम्रो निरन्तरको प्रयासले यो हाललाई रोकिएको छ । यसमा सबैको साथ र सहयोग आवश्यक छ । यदि कानुन जस्ताको त्यस्तै पारित भए लगानी थप निरुत्साहित हुनेछ ।’

उनले युवा, महिला एवम् साना तथा मझौला उद्यमीको प्रवद्र्धनमा महासंघले विशेष पहल गरिरहेको पनि बताएका छन् । साथै, महासंघले मस्यौदा गरेको स्टार्टअप नीतिसमेत पारित भएको अध्यक्ष ढकालले बताए ।

‘महासंघले मस्यौदा गरेको स्टार्ट अप नीति पारित भएको छ । कानुनमा स्टार्ट अपको परिभाषा आएको छ,’ उनले भने, ‘तीन वर्षदेखि निरन्तर स्टार्ट अप नेसन कार्यक्रम आयोजना गरी प्रवद्र्धन र पैरवी गरिरहेका छौ ।’

उनले कैलालीमा सरकारसँगको सहकार्यमा छिट्टै इन्कुवेसन केन्द्र स्थापना गरिने जानकारी दिँदै साना मझौला उद्यमीका लागि एसएमइ विकास केन्द्र महासंघमा स्थापना गर्ने निर्णय भइसकेको जानकारी दिए । यसको प्रभावकारी सञ्चालनका लागि तयारी गरिरहेको अध्यक्ष ढकालले जनाएका छन् । 

‘महासंघलाई सेन्टर अफ एक्सिलेन्सका रुपमा पनि विकास गर्ने हाम्रो योजना छ । जस अन्र्तगत, एफएनसिसिआइ लर्निग सेन्टर र एफएनसिसिआइ इनोभेटर्स क्लब स्थापना गर्ने तयारी छ,’ उनले भने । आगामी डेढ वर्षभित्र महासंघको कम्तीमा ७० प्रतिशत काम डिजिटल गर्ने प्रयास भइरहेको जनाउँदै उनले केही समयपछि बिजनेस इन्टिलिजेन्स सिस्टम पनि सार्वजनिक गर्ने बताए । 

अध्यक्ष ढकालका अनुसार यो सिस्टम एसिया फाउण्डेसनको सहकार्यमा बनाइएको हो । यसले महासंघका पाँच लाखभन्दा बढी सदस्यको डाटावेस राख्ने र रियल टाइम रिसर्च गर्ने क्षमता छ ।