प्रदेश सदस्यको आत्मसमर्पणलाई ‘नौटंकी’ को संज्ञा
सरकारी कागजात किर्तेमा दोषी ठहर भएका प्रदेश सभा सदस्य धनबहादुर केसीले सजाय भुक्तान नगरी सफाई पाएपछि रुकुम पूर्वका स्थानीयले न्यायालय र प्रहरी प्रशासनमाथि नै प्रश्न उठाउन थालेका छन् । एक वर्ष कैद सजाय सुनाइएका रुकुम पूर्वबाट निर्वाचित लुम्बिनी प्रदेशका वर्तमान सांसद केसी एक लाख नौ हजार दुई सय रुपैयाँ तिरेर रिहा भएका थिए ।
लामो समय ‘फरार’ रहेका उनी विवादित छबिका व्यक्ति हुन् । उनीमाथि अवैध तरिकाले बेरोजगार युवालाई विदेश पुर्याएको आरोप लाग्दै आएको छ । नेपालबाट दुबई हुँदै ल्याटिन अमेरिकाको स्थलमार्गबाट अमेरिका लैजाने काममा केसीको संलग्नता रहेको स्थानीय युवाको दाबी छ ।
उनीहरुका अनुसार उक्त कार्यमा राष्ट्रिय अनुसन्धान विभागमा कार्यरत उनका भतिज असई राजु केसी र नातामा ज्वाइँ पर्ने टिकाराम खनाललगायतले सहयोग पुर्याएका हुन् । धनबहादुर विगतमा बोलिभियामा बसेका थिए ।
बेपर्वाह सम्पत्ति भएका उनी नेपाली काँग्रेसबाट निर्वाचित प्रदेशसभा सदस्य हुन् । निर्वाचनताका ‘एक भोट, एक घर, एक सदस्य अमेरिका’ को नारा लगाइएको स्थानीयले सुनेका थिए । विशेष सुरक्षा घेरामा बस्ने गरेका उनी अदालती नजरबाट लामो समय जोगिएका हुन् ।
जिल्ला प्रशासन कार्यालय, नेपाल प्रहरी र अदालतको ‘फरार’ सूचीमा रहेको व्यक्ति सांसद बनेपछि गम्भीर प्रश्न उठाइएको थियो । चुनावी प्रचारप्रसारका क्रममा उनलाई कुनै प्रशासनिक रोकतोक भएन । भदौ अन्तिम साता रुकुम जिल्ला अदालतमा आत्मसमर्पण गरेपनि सजायको भागिदार बन्नुपरेन । देखाउनका लागि प्रहरी प्रशासनको आडमा उनले आत्मसमर्पणको नौटंकी रचेको रुकुमबासीको आरोप छ ।
टिप्पणीहरू