बालुवाटारमा सांसद पक्राउ, भाटभटेनी छेउमा कार्यकर्ताको नाराबाजी

रवि लामिछाने रिहाइको माग गर्दै सडकमा उत्रिएका राष्ट्रिय स्वतन्त्र पार्टी (रास्वपा)का सांसद अशोक चौधरीसहित ढेड दर्जन कार्यकर्ता पक्राउ परेका छन् । 

आज प्रदर्शनको क्रममा बालुवाटारको निषेधित क्षेत्र तोड्न खोजेपछि प्रहरीले उनीहरुलाई समातेको हो । सांसद चौधरीसहित सो पार्टीको काठमाडौँ जिल्ला सभापति प्रदीप विष्ट, ललितपुर सभापति बुद्धरत्न महर्जन, ताप्लेजुङ सभापति वीरेन्द्र श्रेष्ठ, झापा सभापति सुरेश पोख्रेल, सिन्धुपाल्चोक सभापति ध्रुव ढकालसहित १८ जना पक्राउ परेको बताइएको छ । 

बालुवाटारस्थित नेपाल हाउसको आँगनबाट समातिएका उनीहरुलाई प्रहरी वृत्त मालीगाउँमा राखिएको छ । 

बालुवाटारमा प्रहरीले प्रदर्शन गर्न नदिएपछि प्रदर्शनकारीको समूह अहिले नक्साल, भाटभटेनीस्थित पिपलबोट अगाडि नाराबाजी गरिरहेका छन् । त्यसक्रममा उनीहरुले ‘केपी चोर, देश छोड्’, ‘राजनीतिक प्रतिशोध बन्द गर’, ‘केपी ओली पाराले, दु:ख पाए सारा’ले जस्ता नारा लगाइरहेका छन् ।