रविको पक्षमा नारा लाउन कस्सिएका १४ जना बाटैमा रोकिए

रवि लामिछाने रिहाइको माग गर्दै सडकमा उत्रिएका राष्ट्रिय स्वतन्त्र पार्टी (रास्वपा)का कार्यकर्ता धमाधम गिरफ्तारमा पर्न थालेका छन् । 

आज प्रदर्शनको क्रममा बालुवाटारको निषेधित क्षेत्र तोड्न खोजेपछि प्रहरीले सांसद अशोक चौधरीसहित दुई दर्जनलाई समातेको हो । सो पार्टीको काठमाडौँ जिल्ला सभापति प्रदीप विष्ट, ललितपुर सभापति बुद्धरत्न महर्जन, ताप्लेजुङ सभापति वीरेन्द्र श्रेष्ठ, झापा सभापति सुरेश पोख्रेल, सिन्धुपाल्चोक सभापति ध्रुव ढकालसहित २५ जना पक्राउ परेको बताइएको छ । 

उनीहरुलाई प्रहरी वृत्त मालीगाउँमा राखिएको छ । बालुवाटार छिर्न नपाएपछि रास्वपाका नेता-कार्यकर्ता अहिले नक्साल, भाटभटेनीस्थित पिपलबोट अगाडि नाराबाजी गरिरहेका छन् ।  

यता, प्रधानमन्त्री निवास अगाडि नारा लगाउने कार्यक्रममा जान लागेका दर्जनौँलाई प्रहरीले बाटैमा रोकेको छ । शिवपुरी कलेज चोक रसियन दूतावास नजिकै टुडालदेवी जाने चोकबाट १४ जना समातिएका छन् । उनीहरुलाई प्रहरीले महाराजगन्ज वृत पुर्याएको छ ।

त्यस्तै, बिगमार्ट अगाडिबाट पनि ६ जनालाई प्रहरीले नियन्त्रणमा लिएको छ ।