कोलम्बो हुँदै काठमाडौं आएकी अमेरिकी विशेष दूत नयाँ दिल्ली पुगिन्

अमेरिकी विशेष दूत नेपालको पाँच दिने भ्रमण पूरा गरेर नयाँ दिल्ली गएकी छन् । युवा मामिला सम्बन्धी विशेष दूत एबी फिनकेनाउर आज बिहान सवा ११ बजे एअर इण्डियाको उडानमा काठमाडौंबाट नयाँ दिल्ली गएको बताइएको छ ।

वरिष्ठ सल्लाहकार अंकिता एस वर्मासँगै विशेष दूत फिनकेनाउर पहिलो पटक दक्षिण एसिया भ्रमणमा आएको काठमाडौंस्थित अमेरिकी दूतावासले जनाएको छ । उनी बिहीबार श्रीलंका हुँदै काठमाडौं आएकी थिइन् । 

भ्रमणको क्रममा नेपाली युवा नेतृत्वकर्ताहरूसँग राजनीतिमा युवाको सहभागिताबारे अनुभव र विचार आदानप्रदान गरेकी थिइन् । त्यस्तै मानसिक स्वास्थ्य र सामाजिक सञ्जालको चुनौतीहरूबारे पनि छलफल भएको बताइएको छ । 

भ्रमणको क्रममा विद्यार्थीहरूसँग अन्तक्रिया, कीर्तिपुरमा नवीन कार्यशालामा सहभागिता र युवा केन्द्रित अमेरिकी विदेश नीतिको प्राथमिकताबारे आदानप्रदान भएको दूतावासले जनाइएको छ । नेपाल आएको क्रममा उनले काठमाडौंमा पहिलो पटक मःमः को स्वाद लिएकी थिइन् ।