महोत्सव मनाउन मध्यपुरमा सार्वजनिक बिदा

भक्तपुरको मध्यपुर थिमी नगरपालिकाले तीन दिने महोत्सव आयोजना गर्ने भएको छ । नगरपालिकाले आउँदो पुस १२ गतेदेखि १४ गतेसम्म महोत्सव गर्न लागेको हो । 

मध्यपुरलाई पर्यटकीय गन्तव्यको रुपमा विकास गर्ने उद्देश्यका साथ महोत्सव आयोजना गर्न लागिएको नगरपालिकाले जनाएको छ । महोत्सवमार्फत दीर्घकालिन रुपमा नगर र नगरबासीको आर्थिक समृद्धिमा टेवा पुग्ने नगरपालिकाको विश्वास छ। 

नगरपालिकाका अनुसार महोत्सवमा स्थानीय कला, संस्कृति र सम्पदाको प्रदर्शन गरिनेछ । त्यस्तै, मौलिक पेशा, परिकार र उत्पादनको प्रभावकारी प्रवर्द्धनमा पनि महोत्सवले सहयोग पुर्याउने नगरपालिकाले जनाएको छ । 

महोत्सवलाई सफल बनाउन नगरपालिकाले सम्पूर्ण नगरबासीसँग अनुरोध पनि गरेको छ । यस अवधिमा नगरभित्र स्वीकृत लिई घर भत्काउँदा, नयाँ घर बनाउँदा वा अन्य निर्माण कार्य गर्दा आवतजावतलाई बाधा पर्ने गरी निर्माण सामग्री बाटोमा नराख्न नगरपालिकाको आग्रह छ । 

महोत्सव भव्य र सभ्य रुपमा मनाउन पुस १२ र १४ गते नगरपालिका मातहतका कार्यालयहरुमा सार्वजनिक बिदा दिने निर्णय समेत गरिएको छ । साथै, महोत्सवमा स्वस्थकर खाद्य पदार्थ बिक्री वितरणसम्बन्धी मापदण्ड पनि नगरपालिकाले स्वीकृत गरेको छ ।