युद्धमा मारिएका श्रीमानको अन्तिम संस्कारका लागि चाँदनी रुस प्रस्थान

रुस–युक्रेन युद्धमा मारिएका कञ्चनपुरका विराजन विष्टको अन्तिम संस्कारका लागि श्रीमती चाँदनी विष्ट मस्को प्रस्थान गरेकी छिन् । उनी आज भारत हुँदै मस्को गएकी हुन् । 

रुसी सेनामा भर्ती भएका विष्ट युद्धमा मारिएपछि उनको अन्तिम संस्कार गर्न चाँदनी उता गएको रुसी सेनामा आबद्ध नेपालीको जीवनरक्षार्थ अभियानकी संयोजक कृतु भण्डारीले बताइन् । उनका अनुसार चाँदनीको परिवारका तीन सदस्य रुसी सेनामा भर्ना भएका थिए । जसमध्ये दुई जनाको मृत्यु भइसकेको छ भने एक उपचाररत छन् । 

‘उहाँको परिवारको तीन सदस्य रुसी सेनामा हुनुहुन्थ्यो । श्रीमान् विराजन र नाति नाता पर्ने लोकेन्द्रबहादुर विष्टको निधन भएको छ । देवर निराजन विष्टको उपचार भइरहेको छ । उहाँ श्रीमानको अन्तिम संस्कारका लागि आज रुस जानुभएको छ’,उनले भनिन्,‘हामीले धेरै प्रयास गरेर उहाँलाई रुस पठाएका हौं । शव ल्याउन नदिएपनि परिवारको एक सदस्य अन्तिम संस्कारमा जाने व्यवस्था मिलाइदिन भनेर हामी माग गरिरहेका छौं ।’

अवैध रुपमा रुसी सेनामा भर्ती भई युक्रेनसँगको युद्धमा मारिने नेपालीको संख्या ४९ पुगेको छ । ११७ जनाभन्दा बढी घाइते तथा अंगभंग भएका छन् । 

रुसमै अन्तिम संस्कार गरिएकोमध्ये पाँच जनाको अस्तु नेपाल ल्याइएको छ । मृतक ६ जनाको नाम क्षतिपूर्तिका लागि सिफारिस भएपनि हालसम्म पाएका छैनन् । चर्को विरोध भएपछि रुसले नेपालीलाई सेनामा भर्ती गर्न भने रोकेको छ ।