परिचय खुलेपछि निलम्बित असईमाथि थप कारबाहीको तयारी

चितवनमा एक युवकमाथि निर्घात कुटपिट गरेका प्रहरी निरीक्षक (असई) निलम्बनमा परेका छन् । असई बुद्धिबहादुर भुजेलले युवकलाई अनावश्यक कुटपिट गरेको पाइएपछि निलम्बन गरिएको प्रहरीले जनाएको छ । 

मापसे चेकिङ्गको क्रममा असई भुजलले ‘फोन गर्ने ? पावर देखाउने ? ल फोन गर..  कसलाई फोन गर्छस्’ भन्दै युवकमाथि बारम्बार लात्ति प्रहार गरेको भिडियो अहिले सामाजिक सञ्जालमा भाइरल भएपछि प्रहरीले कारबाही अगाडि बढाएको हो । पुस १५ गते राति १० बजे भरतपुर महानगरपालिका–११ तिनखोलेस्थित बाइपास रोडमा प्रहरीले युवकमाथि निर्घात कुटपिट गरेका थिए ।

प्रहरी संगठनको आचारसंहितविपरित कुटपिटमा उत्रिएका असई भुजेललाई सेवाबाट निलम्बन गरिएको जिल्ला प्रहरी कार्यालय चितवनका एसपी गौतम मिश्रले जानकारी दिए । उनका अनुसार डिएसपी ज्ञानकुमार महतोको नेतृत्वमा तीन सदस्यीय छानबिन समिति बनाइएको छ । समितिले अनुसन्धानपछि प्रतिवेदन तयार पार्ने र सोही आधारमा भुजेलमाथि थप कारबाही अघि बढाइने एसपी मिश्रको भनाई छ ।