सिसिटिभीबाट पत्ता लाग्यो बंगलादेशीको आइफोन

काठमाडौंमा एक बंगलादेशी नागरिकको कारमा छुटेको आइफोन फेला परेको छ । ट्राफिक प्रहरीको सक्रियतामा रसेल अहमद रोनीको आइफोनसहित दुई थान मोबाइल भेटिएको छ । प्रहरीका अनुसार हिजो दिउँसो ३ बजे ठमेलदेखि इन्द्रचोकसम्म बा. १ ज ८२०९ नम्बरको भाडाको कारमा यात्रा गर्ने क्रममा उनको आइफोन १५ प्रो र समसुङ एस २३ अल्ट्रा मोडलको मोबाइल छुटेको थियो ।

मोबाइल हराएपछि उनले काठमाडौं उपत्यका ट्राफिक प्रहरी कार्यालयमा लिखित निवेदन दिए । ट्राफिक प्रहरीले उपत्यका प्रहरी कार्यालयको सिसिटिभी शाखासँग समन्वय गरेर गाडीको नम्बर पहिचान गरेको र एकान्तकुनास्थित यातायात व्यवस्था कार्यालयको सहयोगमा चालक झिकाउँदै गाडीमा छुटेको आइफोन बंगलादेशी नागरिकलाई हस्तान्तरण गरिएको हो ।