युक्रेन युद्धमा मारिएका विनोदको प्रतिरूप बनाएर अन्त्येष्टि

युक्रेन युद्धमा मारिएका ओखलढुंङ्गाका विनोदबहादुर सुनुवारको शवको प्रतिरूप बनाएर आज पशुपति आर्यघाटमा अन्तिम संस्कार गरिएको छ । ३७ वर्षे सुनुवारको मृत्युबारे रुसले आधिकारिक पुष्टि गरेको छैन । तर रुसी सेनामा भर्ति भएका उनको मृत्यु युक्रेनी आक्रमणमा भएको त्यहाँ रहेका उनका नेपाली सहकर्मीहरुले बताउँदै आएका छन् ।

१८ वर्ष नेपाली सेनामा काम गरेका उनी रुसी सेनामा भर्ना भएर युक्रेन युद्धमा सामेल भएका थिए । पीडित परिवारले क्षतिपूर्ति माग गर्दै आएपनि हालसम्म रुसले त्यसबारे केही बोलेको छैन । परराष्ट्र मन्त्रालयका अनुसार युक्रेन युद्धमा ४८ जना नेपालीको ज्यान गइसकेको छ ।