जरिवाना पुर्जी थमाउन बालेनको टोली पूर्व राजाको दैलोमा

अस्ति तीनकुने,कोटेश्वर, सिनमंगल क्षेत्रमा गरिएको फोहोर,सार्वजनिक तथा निजी सम्पत्ति तोडफोडबापत तिराइएको जरिवाना पत्र बुझाउन काठमाडौं महानगरको प्रहरी टोली निर्मल निवास पुगेर उक्त पत्र निर्मल निवासको ढोकामा बुझाउन कोशिस गर्दैछ ।

पूर्व राजा ज्ञानेन्द्रका नाममा महानगरले हिजो सात लाख ९३ हजार रुपयाँ जरिवाना भन्दै आठ वटा पत्र लेखेको थियो । सोही पत्र बोकेर महानगर प्रहरी बलका कर्मचारीहरु त्यहाँ पुगेका हुन् । निर्मल निवासका कर्मचारीले पत्र बुझ्न नमानेपछि महानगर प्रहरीहरु ढोकामा रोकिएका छन्  । 

यता ज्ञानेन्द्र शाहलाई तिर्न लेखिएको जरिवाना विदेशमा बस्ने राजावादीहरुले तिर्ने भन्दै रकम संकलन गर्न थालिएको छ । रमेशराज बास्तोलाले पूर्वसचिव भीम उपाध्यायलाई ट्याग गरेको फेसबुक मेसेञ्जरमा रकम उठाउन थालिएको ब्यहोरा उल्लेख छ । उनीहरुले अंगत देवकोटाको नाममा एनआइसी एसियाको बैंक खातामा रकम जम्मा गर्न र उनको मोबाइलमा सम्पर्क गर्न भनेका छन् । निर्मल निवासको सट्टा आफूहरुले महानगरको जरिवाना तिरिदिने उपाध्याय र बास्तोलाहरुको भनाइ छ । 

उपाध्याय राज्यकोषबाट पेन्सन बुझ्ने पूर्व सचिव हुन् भने नेपाल वायुसेवा निगमको सञ्चालक समिति सदस्य किशोर प्रधान शुक्रबारअघि बिज्ञपति निकालेर राजावादी जुलुसलाई सघाउने ३२ भाइमध्येका हुन् । उनीहरुले शुक्रबारको कार्यक्रमलाई सफल बनाउन आग्रह गर्दै राजावादीहरुको आन्दोलनलाई समर्थन गर्न आग्रह गरेका थिए । सरकारलाई पनि राजावादीहरुसँग वार्ता गर्न आग्रह गदैै अघिल्लो दिन राजधानीको पाँचतारे होटलमा कार्यक्रम गरेका थिए  ।