हार स्वीकार्न ट्रम्प तयार, बाइडेनको टिम तयार

अमेरिकी जनरल सर्भिस एडमिनिस्ट्रेशनका प्रशासक एमिली मर्फीले सोमबार राष्ट्रपतिमा निर्वाचित जोसेफ आर बाइडेन जुनियरलाई औपचारिक रूपमा राष्ट्रपति पदको विजेता घोषणा गरेका छन् । यता निर्वाचनमा पराजित राष्ट्रपति डोनाल्ड ट्रम्प पनि अन्ततः निर्वाचन परिणाम स्वीकार्न तयार भएका छन् । मर्फीको घोषणासँगै अब निर्वाचित घोषित राष्ट्रपतिले सरकारी कोषबाट खर्च ब्यहोर्ने गरी आफ्ना सल्लाहकारहरू नियुक्त गर्न बाटो खुलेको छ । आगामी दुई महिनासम्म बाइडेनको त्यहि टोलीले वर्तमान सरकारसँग आवश्यक समन्वय पनि गर्नेछ ।

राष्ट्रपति बाइडेन र उपराष्ट्रपति कमला ह्यारिसले जनवरी २० तारिखका दिन ह्वाइट हाउसमा आयोजना हुने विशेष समारोहमा पद तथा गोपनीयताको शपथ ग्रहण गरेपछि नयाँ राष्ट्रपतिको औपचारिक कार्यकाल शुरु हुनेछ । अमेरिकी संविधानअनुसार राष्ट्रपतिलाई त्यहाँका प्रधानन्यायाधीशले शपथ गराउने छन् ।

नयाँ सरकार गठनको तयारी र ट्रम्प प्रशासनसँग समन्वयको लागि बाइडेनले केही मन्त्री र सल्लाहकार तय गरेको प्राप्त समाचारमा जनाइएको छ । अमेरिकाको आगामी विदेश मन्त्रीमा एन्टोनी ब्लिन्केन र आन्तरिक ९गृह० मन्त्रीमा अलेजान्द्रो मेयोरकासलाई चयन गरिएको छ ।

त्यसैगरी एभ्रिल हेन्सलाई नेशनल इन्टिेलिजेन्सको निर्देशक,लिण्डा थोमस ग्रिनफिल्डलाई राष्ट्रसंघको लागि राजदूत,जेक सुलिभानलाई राष्ट्रिय सुरक्षा सल्लाहकार र पूर्व विदेशमन्त्री जोन केरीलाई जलवायु परिवर्तनसम्बन्धी राष्ट्रपतिको विशेष दूतमा नियुक्त गरिएको छ । यी सबैले आगामी जनवरी २० देखि मात्र औपचारिक जिम्मेवारी सम्हाल्नेछन् ।