प्राध्यापकको दराजभरि पेस्तोल र गोली

हातमा कलम बोक्नुपर्ने एकजना प्राध्यापक स्वचालित पेस्तोल र गोलीगठ्ठासहित समातिएका छन् । ठाकुरराम बहुमुखी क्याम्पस वीरगञ्जका प्राध्यापक स्वचालित पेस्तोलसहित मंगलबार राती वीरगञ्जबाट पक्राउ परेका हुन् । स्थानीय क्याम्पसमा कार्यरत सर्लाही बलरा नगरपालिका–१० का जितेन्द्रप्रसाद सिंहलाई अवैध हतियारसहित वीरगञ्ज–११,दुर्गाटोलस्थित निवासबाट विशेष सुराकीको आधारमा प्रहरीले पक्राउ गरेको हो ।

विशेष सूचनाका आधारमा निजको घरमा छापा मारी खानतलासी गर्दा प्रहरीले दराजको सेफ बक्समा लुकाइछिपाई राखेको अवस्थामा एक थान पेस्तोल बरामद भएको जनाएको छ । दराजबाट पेस्तोलमा प्रयोग हुने म्यागजिन १२ थान,नपड्काइएको गोली ४३ थान,मानिसलाई बेहोस पार्ने एनेस्थेतिक इथर एक बोतल पनि फेला परेको छ ।

पक्राउ परेका सिंहलाई आवश्यक अनुसन्धानका लागि जिल्ला प्रहरी कार्यालय,पर्सामा राखी हातहतियार तथा खरखजानासम्बन्धी मुद्दा चलाउने तयारी छ ।