प्रधानमन्त्रीले आजको बैठकमा ‘राजनेता’को छनक दिने

विशेषगरी आजको बैठकमा अध्यक्ष तथा प्रधानमन्त्री ओलीले पार्टी एकता र आन्तरिक परिस्थितिलाई नसोचेको खराब अवस्थामा पुर्याउने आँकलन गर्दै जवाफ पेश गर्ने धारणा बालुवाटारमा रहेका केही सल्लाहकारले खुलमखुल्ला सञ्चारमाध्यममा छरपस्ट पारिरहेका छन् । तर, दुई तिहाई बहुमत नजिकको इतिहासकै शक्तिशाली सरकारको नेतृत्व गर्नुभएको र मुलुकमा एकीकृत कम्युनिष्ट पार्टी निर्माणमा ऐतिहासिक पहल गर्नुभएका प्रधानमन्त्री तथा नेकपा अध्यक्ष सुझबुझ र जिम्मेवारपूर्ण ढंगले आजको बैठकमा प्रस्तुत हुने बालुवाटार निकट अर्काथरीले बताएका छन् ।

पार्टीको इतिहासमा अभिलेख रहने भएकाले पनि अहिले मिडियामा छरपष्ट पारिएकोजस्तो असभ्य लिखित जवाफ बैठकमा दर्ज नहुने उनीहरूको दाबी छ । प्रधानमन्त्री निकट एकजना नेता भन्छन् ‘फलेको वृक्ष सदैव निहुरिन्छ । अहिले पार्टीको लागि प्रधानमन्त्री तथा अध्यक्ष ओली फलेको बृक्ष हुनुहुन्छ । त्यसैले वहाँले समस्यालाई बुद्धिमत्तापूर्वक समाधान गर्ने हिसाबले शिष्ट भाषा र तवरले आफ्ना लिखित धारणा राख्ने तयारी गरिएको छ ।’

अर्कोतर्फ,प्रधानमन्त्रीका अति विश्वासपात्र तथा निकटस्थ नेताहरूले समस्या समाधानको लागि गरेको दौडधुप र राखेका अप्रत्यक्ष प्रस्तावबाट पनि प्रधानमन्त्रीले यसअघिका सबै प्रस्तुतिलाई माथ गर्नेगरी आजको बैठकमा ‘राजनेता’ को छनक दिने बताइन्छ । हिजो अबेरसम्म राजधानीमा देखिएको बालुवाटार निकट नेताहरूको दौडसँगै समाधानका विभिन्न उपायहरूको समेत चर्चा र घुमाउरो प्रस्ताव हुन थालेको हो ।

चालु संसदको कार्यकालभरि संसदीय दलको नेता तथा प्रधानमन्त्री केपी शर्मा ओली नै रहने र अध्यक्षको जिम्मेवारी मात्रै छाड्दा के होला ? भनेर समेत भेटघाटमा कुरा उठेको बताइन्छ ।

जनादेशलाई आत्मसम्मान गर्दै चालु संसदको कार्यकालभरि संसदीय दलको नेता तथा प्रधानमन्त्री केपी शर्मा ओली नै रहने र अध्यक्षको जिम्मेवारी मात्रै छाड्दा के होला ? भनेर समेत भेटघाटमा कुरा उठेको बताइन्छ । त्यस्तै अर्को एउटा प्रसंगमा समस्या समाधानको लागि सचिवालयलाई थप समावेशी बनाउने उद्देश्यले अष्टलक्ष्मी शाक्य,कृष्णबहादुर महरा र शंकर पोखरेल (महासचिव बनाउने गरी) लाई समेटेर १२ सदस्यीय बनाउँदाको अवस्थालाई पनि मनन् गर्न हिजो बेलुकीदेखि घुमाउरो तवरले कुरो उठेको छ ।

यसबीच पूर्व उपप्रधानमन्त्री तथा नेकपाका उपाध्यक्ष वामदेव गौतम र उपप्रधानमन्त्री तथा पूर्व महासचिव ईश्वर पोखरेलबीच गौतम निवास भैंसेपाटीमा भएको झण्डै डेढ घण्टा लामो भेटवार्तामा पोखरेलले पनि अध्यक्ष छाड्दा र सचिवालयको संख्या थप गर्दाको परिस्थितिको बारेमा संकेत गर्नुभएको बताइन्छ । पोखरेलले विशेषगरी पूर्व एमालेका नेताहरूसँगको भेटमा जनताको बहुदलीय जनवादको विषयलाई उठाउँदै आउनुभएको छ । त्यसक्रममा हिजो गौतमसँगको भेटमा पनि उहाँले समस्या समाधानको उपाय भन्दै सो प्रस्ताव गरेको हुनसक्ने स्रोतको दाबी छ ।