चिनियाँ रक्षामन्त्रीको त्यो कुदाइ (भिडियो)

एक दिनको व्यस्त नेपाल भ्रमणमा हिजो बिहान पौने एघार बजे आएर साँझ फर्केका चिनियाँ रक्षामन्त्री वेई फेङ्गह विमानस्थलबाट सोझै बालुवाटारस्थित चिनियाँ दूतावास पुग्नुभएको थियो । लञ्च र केहीबेरको विश्रामपछि उहाँ भद्रकालीस्थित नेपाली सेनाको जङ्गी अड्डामा द्विपक्षीय वार्ताको लागि पुग्नुभयो । वार्तामा यसअघि भएको सहमतिबमोजिम ५ करोड आरएमबी (८० करोड नेपाली रुपैयाँ) बराबरको सहायता तत्काल उपलब्ध गराउने वचन मन्त्री वेईले दिनुभएको बताइन्छ ।

कोभिडको कारण उक्त सहयोग प्याकेज रोकिएको थियो । तर,चीनमा हाल कोभिडको खासै समस्या नभएकोले अब भन्सारनाका र
बन्दरगाहहरु पूूर्णरुपमा खुलेपछि उक्त सहयोग प्याकेज तत्काल अघि बढाउन आवश्यक प्रक्रिया थालिने बताइएको छ । नेपाली सेना र चिनियाँ जनमुक्ति सेनाबीच धेरै बर्ष देखि तालिम र अन्य आदानप्रदान कार्यक्रम हुँदै आएका छन् । कोभिडको कारण यसबीच हुनुपर्ने उच्चस्तरीय तालिमहरु रोकिएका थिए । हिजोको वार्तामा भएको सहमतिअनुसार अब ती सबै सहकार्य सुचारु हुनेछन् ।

चीनमा हुने नौ महिने कोर्षको उच्चस्तरीय सैन्य तालिममा चार जना वरिष्ठ अधिकृत जाने गर्थे । ती तालिमको लागि अधिकृतहरुको छनौट भएपनि कोभिडको कारण स्थगित भएको थियो । चीनलगायत विश्वका अन्य धेरै मुलुकमा गरेर वार्षिक १२ देखि १३ जनाले त्यस्तो उच्चस्तरीय तालिममा अधिकृतहरुले भाग लिने गरेका छन् । पछिल्ला दिनमा नाइजेरिया,केन्यामा समेत तालिमको लागि सेनाले वरिष्ठ अधिकृतहरुलाई पठाउने गरेको छ ।

चिनियाँ रक्षामन्त्रीको भ्रमण दलमा २१ जना सदस्य थिए । रक्षामन्त्री वेई केन्द्रीय सैन्य आयोगका महत्वपूर्ण हस्ती हुन् भने भ्रमण दलमा सेनाका उच्च अधिकारीहरुको साथै छेन्तु प्रान्तीय मिलिटरी कमाण्डका अधिकारीहरु थिए । भ्रमणदलमा उक्त कमाण्डका डेपुटीसमेत रहेको बताइन्छ । सन १९६२ को भारतसङ्ग लडाइँमा खटिएको फौज चिनियाँ सर्वोच्च नेता दङ्ग स्याओपिङको यही सछ्वान प्रान्तबाट खटिएका हुन् । स्रोत भन्छ ‘चारतारे रक्षामन्त्रीसहित अधिकांश दुई तारे र एक तारे सैनिक अधिकृतहरु थिए । विशेषगरी सैन्य सहयोग शाखाका अधिकारीहरु धेरै थिए ।’

गत वर्ष चिनियाँ राष्ट्रपति सी जिनपिङ्ले गर्नुभएको नेपाल भ्रमणमा दिइएका वचन र प्रतिबद्धतामध्ये हालसम्म पूरा नभएका कार्यक्रमहरुलाई निश्कर्षमा पुर्याउन रक्षामन्त्रीको भ्रमण टोलीलाई खटाईएको बुझिएको छ । एक किसिमले आइतबार भएको वेईको भ्रमणलाई राष्ट्रपति सीको गत वर्ष भएको भ्रमणको ‘फलोअप’ को रुपमा लिनुपर्ने नेपाली सैन्य अधिकारीहरुले बताएका छन् ।

सैनिक मुख्यालयमा रक्षामन्त्री वेई र प्रधान सेनापति थापाबीच केहीबेर दोभाषे राखेर पाँचौ तलाको कार्यकक्षमा भएको थियो । त्यसबखत चिनियाँ भ्रमण दलका तीनजना पनि वान टु वान वार्तामा सरिक थिए । बाँकी १७ जना तल मुख्यालयको हलमा नेपाली वरिष्ठ सैन्य अधिकारीहरुसँगै गफिए ।

चिनियाँँ प्रतिनिधिमण्डलले कोभिड प्रोटोकलको कडा पालना गर्दै औपचारिक भेटवार्ता गरेको र कुनैपनि स्थानमा पानी पनि नखाएको बताइन्छ ।

मुख्यालयमा पुग्ने बित्तिक्कै चिनियाँ रक्षामन्त्रीलाई नेपाली सेनाको एक टुकडीले सम्मान गारत दिएको थियो । यसअघि कुनैपनि विदेशी पाहुनालाई जंगी अड्डामा गार्ड अफ अनर दिइएको थिएन भने दिने चलनसमेत थिएन । तर,वेई सेनासँग सम्बन्धित उच्च अधिकारी र स्वयम् रक्षामन्त्री पनि भएकाले गार्ड अफ अनर दिइएको स्रोतले बताएको छ । अरु मन्त्रीहरु अर्को मुलुकको भ्रमणमा गएपनि सामान्यतयाः जंगी अड्डामा जाँदैनन् र जाने कार्यक्रम पनि हुँदैन ।

प्रोटोकलको हिसाबले वेई मन्त्री मात्र भएकाले राष्ट्राध्यक्ष वा सरकार प्रमुखलाईझैँ विमानस्थलमा सलामी दिने कुरो पनि भएन । तर,उनी स्वयम् रक्षामन्त्री पनि भएकाले र जंगी अड्डामा समेत उपस्थिति हुने कार्यक्रम भएपछि त्यहिँ सलामी दिने कुरो मुनासिब रहेको सैनिक स्रोतले बताएको छ ।

जंगी अड्डाको कुराकानीमा दुबै पक्षले खुलस्त आफ्ना धारणा राखेको र नेपाललाई जस्तोसुकै सहयोग गर्न चीन तयार रहेको बताइएको स्रोतको दाबी छ । सेनाको चासोलाई सम्बोधन गर्न चिनियाँ पक्षको पूरा तयारी देखिन्थ्यो । वार्तामा नेपाल र नेपाली सेनाको लागि कोरोनाबिरुद्ध खोप दिन तयार रहेको संकेतसमेत रक्षामन्त्रीले दिएको बताइन्छ ।

जङ्गी अड्डाको कार्यक्रमपछि अपरान्ह सवा चार बजेतिर रक्षामन्त्री राष्ट्रपतिसँग शिष्टाचार भेटको लागि शीतल निवास पुग्नुभएको थियो । त्यसपछि उहाँ रक्षा मन्त्रालयको समेत जिम्मेवारी लिएका प्रधानमन्त्रीसँग भेट गर्न सरकारी निवास बालुवाटार जानुभयो । बालुवाटारबाट निस्केपछि वेई विमानस्थल पुग्दा साँझको ७ बजेको थियो । भिडियो