उदय सेठ्ठी समूहका खुंखार अपहरणकारी सोले पक्राउ

एक करोड ५० लाख रुपैयाँ फिरौती असुली प्रकरणमा संलग्न सोले कुमार भनिने दुर्गाबहादुर बुढाथोकी पक्राउ परेका छन् । बाबुराजा रावललाई अपहरण गरी फिरौती असुली गरेर १२ वर्षसम्म फरार रहेका उनलाई प्रहरीले मंगलबार ईलामको पशुपतिनगरबाट पक्राउ गरेको हो । नेपाल प्रहरीको केन्द्रीय अनुसन्धान ब्युरो (सीआईबी) बाट खटिएको विशेष टोलीले उदय सेठ्ठी समूहका अपहरणकारी बुढाथोकीलाई पशुपतिनगरस्थित भारतसँगको सीमा क्षेत्रबाट पक्राउ गरेको हो ।

प्रहरीका अनुसार बुढाथोकीले आफ्नो नाम ‘प्रकाश क्षेत्री’ राखेर भारतको दार्जिलिङमा ‘प्रकाश स्टोर्स’ नामको कपडाको होलसेल पसल सञ्चालन गरेका थिए । विभिन्न अपराधमा संलग्न बुढाथोकीले २०६५ साल पुस १ गते रावललाई अपहरण गरी बन्धक बनाइ फिरौती रकम लिई भोलिपल्ट राती गाडीमा राखेर टोखा पुर्याइ छाडेका थिए ।

सर्लाहीको ढुंग्रेखोला स्थायी घर भएका बुढाथोकी अपहरणकारी उदय सेठ्ठी र प्रह्लाद महतको समूहमा रहेर विभिन्न अपराध गर्दै आएको प्रहरीले जनाएको छ । अपहरण तथा गुण्डागर्दीमा सक्रिय बुढाथोकी २०६४ सालमा बानेश्वर प्रहरीको हिरासत तोडेर बेपत्ता भएका थिए । यसअघि महानगरीय अपराध महाशाखाको टोलीले २०६६ पुसमा सेठ्ठी र महतसहित विष्णु जिसी, टासी गुरुङ, विकासबहादुर कार्की र मानवदेव गुरुङलाई पक्राउ गरी मुद्दा चलाएको थियो ।