प्रधानमन्त्रीले त्यतै पुगेर भन्नुभयो : ‘नानीभन्दा नाना ठूलो, मान्छेभन्दा कुरा ठूलो’

प्रधानमन्त्री केपी ओलीले आफूलाई अध्यक्ष चुनेको नवौं एमाले महाधिवेशनबाट बिजयी उपाध्यक्ष भीम रावलमाथि उनकै क्षेत्र सुदूर पश्चिमको धनगढी पुगेर यसो भन्दै रिस फेर्नुभएको छ ।

सचिवालयको बैठक बस्नसमेत मन नपराउने तत्कालीन एकीकृत नेकपाका अध्यक्ष केपी शर्मा ओलीलाई अहिले बैठक,भेला र कार्यक्रममा पुग्न भ्याई नभ्याई छ।

केहि दिनअघि काठमाडौँको एउटा कार्यक्रममा प्रचण्डलाई धुन आफूले ड्रमका ड्रम पानी र दर्जनका दर्जन डोब साबुन खर्च गर्दा पनि नसकेको भन्दै लाचारी व्यक्त गर्नुभएको थियो । अर्को कार्यक्रममा चाहिँ माधव नेपाललाई प्रचण्डको कार्यकर्तासमेत भन्न भ्याउनु भयो । आज धनगढीमा पनि उहाँले नेपाल आफूभन्दा जुनियर भएको बताउनुभयो,भन्नुभयो,‘म २२ सालदेखि राजनीतिमा छु,माधव नेपाल बल्ल ३२ सालदेखि’ ।

उहाँले नुहाउँदा २/४ ओटा रौँ झरेर केही नहुने भन्दै पार्टीमा आफू अझै शक्तिशाली भएको भाव प्रकट गर्नुभयो । उहाँले प्रचन्डलाई आज पनि बाँकी राख्नुभएन । कटाक्ष हान्दै भन्नुभयो, ‘काम लाग्छ कि भनेर ल्याएको तर बिचार उस्तै,मति उस्तै ।’ लाटोकोसेरोको उपमा दिँदै अगाडि भन्नुभयो-घाम लागेपछि टिक्न नसक्ने ।

माघ १ गतेदेखि परराष्ट्र मन्त्री भारत जाने र कालापानीलगायतका भूमि फिर्ता ल्याउने ओलीको भनाइ थियो । पार्टीको बैठकमा बस्न रुचि नराख्ने भनिएका ओलीले प्रचण्ड,माधव नेपाललाई बैठकमा नआएको आरोप लगाउनुभयो,‘बैठकमा किन आएनन् भनेको त निर्वाचन आयोगमा पार्टी मेरो हो भन्न पो गएका रहेछन् ।‘

ओली त्यतिमै कहाँ रोकिनुहुन्थ्यो र ! फेरि भन्नुभयो-“दुई चार दिनमा मर्नेलाई किन भोट हाल्नु भन्थे तर दुई वटा किड्नी फेरेर पनि जिउँदै छु। यो स्वास्थ्य देशका लागि हो ।”