पशुपतिमा सुन हाल्ने हैन, तराईको चिसोबाट जनतालाई बचाऊ: रघुजी पन्त

नेकपा स्थायी कमिटी सदस्य रघुजी पन्तले प्रधानमन्त्री केपी शर्मा ओलीले जनतामाभन्दा पशुपतिनाथमाथि अत्यधिक विश्वास राख्नुभएको टिप्पणी गर्नुभएको छ । आज राजधानीमा आयोजित नेकपाको विरोध सभामा बोल्दै उहाँले प्रधानमन्त्री ओली तानाशाह बनिसकेकाले पशुपतिनाथको शरणमा पुग्नुपरेको बताउनुभयो ।

नेता पन्तले प्रधानमन्त्री ओलीले सँधै जनतालाई ढाँट्ने गरेको बताउँदै भन्नुभयो ‘कुनै सभामा सम्बोधन गर्दा प्रचण्ड र माधव नेपालको असहयोगले जनताको अपेक्षा पूरा गर्न नसकिएको भनेर उल्लेख गर्ने र आफ्नै भनाइको खण्डन हुने गरी अर्कोतर्फ आफ्नो कार्यकालमा जति विकास हालसम्म कुनै प्रधानमन्त्रीको पालामा नभएको दाबीले उहाँका कुरा सबै झुठा प्रमाणित भएको छ ।’

प्रधानमन्त्री ओलीले पशुपतिमा सुनको जलहरीका लागि करोडौं रूपैयाँ निकासा गरेकोमा आलोचना गर्दै पन्तले त्यस्तो रकम अन्यत्र निकासा गर्न सुझाव दिनुभएको छ । उहाँले जनता चिसोले मृत्युवरण गरिरहेको भन्दै तराईका जनतालाई चिसोबाट बचाउन आग्रह गर्नुभयो र भन्नुभयो ‘ओलीले सुनको सिंहासन खोज्नुभएको छ ।’