गणेश बनाउने, रेडियो नेपाल बजाउने

नेकपा ओली समूहका नेता तथा कार्यकर्तामध्ये केहीले हात धोएर अर्को पक्षको उछित्तो काढ्न प्रविधिको दुरुपयोग गरिरहेका धेरै वटा प्रमाण भेटिएका छन् । बुधबार नेकपा (बहुमत) ले राजधानी काठमाडौंमा आयोजना गरेको प्रतिगमनविरुद्धको प्रदर्शन र बृहत् सभाको बिरुद्ध पनि त्यस्तै हर्कत गरिएको पाइयो ।

कार्यक्रमलगत्तै जनता टाइम्स डट कमले ‘प्रचण्ड–माधवले नेतृत्व गरेको जुलुसमै भारतको झण्डा प्रयोग,यसरी खुल्यो नेपालबिरोधी हर्कतको रहस्य’ शीर्षकमा समाचार लेख्दै भारतीय र अमेरिकी झण्डा हल्लाइएको अलग अलग फोटोसमेत प्रकाशित गरेको थियो । त्यहि समाचारलाई सरकारी प्रेस संगठनका अध्यक्ष गणेश बस्नेतले सामाजिक सञ्जालमा सेयर गरिदिए । हुन तः टाइम्स पनि बस्नेत सम्पादक रहेकै अनलाइन हो । आफैँले लेखेको गलत समाचार उनी आफैँले सेयर गरेका हुन् ।

तर,नेपाल फ्याक्ट चेकर डट ओआरजीले सोही साँझ बस्नेतले सेयर गरेको फोटोलाई ‘मिथ्या फोटो’ भनेर प्रमाणित गरिदिएको थियो । राज्यको चौथो अंगमा बसेको,त्यो पनि सरकारी पत्रकार संगठनका अध्यक्षले नै यस्तो काइते काम गर्न थालेपछि नेपाली पत्रकारिता र प्रेस जगतप्रति जनताको अविश्वास बढेको गुनासो छ ।

उक्त गलत कार्यप्रति प्रतिक्रिया दिँदै पत्रकार सीताराम बरालले गणेशको फेसबुक वालमा ‘सभामा जानेहरुले नदेखेको,नजानेहरुले देखेको भारतीय र अमेरिकी झण्डा’ भनेर लेखिदिएका छन् ।

त्यसैगरी उपराष्ट्रपतिका छोरा दिपेश पुनले ‘गणेश कमरेड,जे जस्तो भए पनि तपाईं प्रतिगामी ओली समूहका पत्रकारहरुको अध्यक्ष हो । तपाईंको व्यक्तित्वले भर्खरका केटाकेटीजस्तो जिस्किन र काम बिगार्न अनुमति दिँदैन तसर्थ एकै ठाउँमा दुईवटा फोटो एडिट गरेर समय बर्बाद नगर्दा नै सही होला ।’ भनेर तिखो व्यङ्ग्य गरेका छन् ।

यता,प्रधानमन्त्री केपी शर्मा ओलीले प्रतिनिधिसभा विघटन गरेपछि रेडियो नेपालबाट साँझ ७ बजेको समाचारलगत्तै प्रशारण हुने ‘घटना र विचार’ कार्यक्रमबाट पनि नेकपा विवादसम्बन्धी समाचारमा पनपच्छे गर्दै एकलकाँटे विवरण प्रशारण हुन आएको स्रोताहरुले गुनासो गरेका छन् ।