चितुवाको छालासहित समातिए चार जना

प्रहरीले काठमाडौंको नयाँ बसपार्क नजिकैबाट चितुवाको छाला कारोबारमा संलग्न ४ जनालाई पक्रेको छ । प्रहरी टोलीले हिजो दिउँसो नयाँ बसपार्क,मित्रनगरको ऐश्वर्य मार्गमा प्रभुचरण पाहुना घरको कोठा नम्बर २०४ बाट चितुवाको छालासहित उनीहरुलाई पक्रेको हो ।

विशेष सुराकीको आधारमा प्रहरी टोली होटल कोठामा पुग्दा कारोबारमा संलग्न ब्यक्तिहरु ६ फिट २ इञ्च लम्बाई र २२ इञ्च चौडाईको चितुवाको छालासहित फेला परेका हुन् ।

पक्राउ परेका सोलुखुम्बु मापे दूधकोशी गाउँपालिका ३ घर भई चाबहिल बस्ने वर्ष ३२ का एकप्रसाद राई, उदयपुरको कटारी नगरपालिका ६ घर भई नयाँ बसपार्क बस्ने वर्ष २८ का निशान्तकुमार रहपाल,तनहुँ रिसिङ गाउँपालिका ७ घर भई काठमाडौं नयाँ बसपार्क बस्ने वर्ष ३३ का गोपाल थापामगर र सोलुखुम्बु मापे दूधकोशी गाउँपालिका ८ घर भई नयाँ बसपार्क बस्ने वर्ष ३३ का भीमबहादुर कामीलाई आवश्यक कारबाहीको लागि डिभिजन वन कार्यालय,नक्साल हात्तिसार लगिएको बताइएको छ ।