करोडौंको स्रोत नखुलेपछि नक्कली यातायात व्यवसायीविरुद्ध विशेष अदालतमा मुद्दा दायर

यातायात व्यवसायीको भेषमा आर्जन गरेको करोडौं रुपैयाँको स्रोत नखुलेपछि एकजना नक्कली यातायात व्यवसायी र उनकी श्रीमतीविरुद्ध सम्पत्ति शुद्धिकरण अनुसन्धान विभागले आज विशेष अदालतमा अभियोग पत्र दायर गरेको छ ।

रामबहादुर लामा र उनकी श्रीमती कान्छी लामाले सम्पत्ति शुद्धिकरणको कसुर अपराध गरेको तथ्य पुष्टि भएपछि विभागले आज उनीहरुलाई ७ करोड १२ लाख ८१ हजार ७ सय २७ रुपैयाँ ६७ पैसा बिगो र त्यसको दोब्बर जरिवाना दाबी गरी मुद्दा दायर गरेको हो ।

त्यसैगरी गैरकानुनी सम्पत्ति र आर्जनको स्रोत लुकाउन विभिन्न हर्कत् गरेको अभियोगमा निजहरुलाई झण्डै ७० लाख बिगो कायम गरी दोब्बर रकम जरिवाना समेत माग गरिएको छ । विभागले उनीहरुलाई २ देखि १० वर्षसम्मको कैद सजाय माग गरेको छ भने सम्पूर्ण चल अचल सम्पत्ति जफत हुन मागदाबी गरेको छ ।

बसको सिण्डीकेटप्रथामा व्यवसायीहरुले प्रत्येक नयाँ व्यवसायीबाट ५ लाख रुपैयाँ उठाउँदै आएका थिए । त्यहि रकमको आम्दानी गैरकानुनी देखिएपछि उनलाई सम्पत्ति शुद्धिकरण विभागले मुद्दा दायर गरेको बताइएको छ ।

नुवाकोट ककनी गाविस घर भई काठमाडौं १६, बालाजु बस्दै आएका लामा दम्पत्ति नक्कली पेशा व्यवसाय गरेर गैरकानुनी सम्पत्ति आर्जनमा संलग्न थिए ।