अमेरिकी बैंकबाट गैरकानुनी ढंगले डलर झिक्ने जोशीविरुद्ध विशेष अदालतमा मुद्दा दायर

अमेरिकी जेपी मोर्गन चेज बैंकबाट नेपालमा लाखौं डलर गैरकानुनी ढंगले ट्रान्सफर गरेका पंकज जोशी विरुद्ध सम्पत्ति शुद्धिकरण अनुसन्धान विभागले आज विशेष अदालतमा अभियोग पत्र दायर गरेको छ ।

जोशीले अमेरिकामा रहँदा उक्त बैंकबाट बैंक अफ काठमाडौंमा आजभन्दा १२ वर्षअघि ठगी स्वरुप गैरकानुनी ढंगले २ लाख ९० हजार अमेरिकी डलर ट्रान्सफर गरेका थिए । उक्त रकम सम्पत्ति शुद्धीकरण निवारण ऐन विपरित देखिएपछि विभागले सो वापत तत्कालीन विनिमयदरअनुसार २ करोड ८ लाख ८३ हजार २ सय ४२ रुपैयाँ ७३ पैसा बिगो कायम गरी सोही बराबर जरिवाना र कसुरको मात्रा अनुसार कैद सजायको माग दाबी गर्दै मुद्दा दायर गरिएको हो ।साथै विभागले डिल्लीबजार निवासी जोशीकाे आईसीएफसी फाइनान्समा रहेको खाताको झण्डै ७८ हजार रुपैयाँ समेत जफत गर्न मागदाबी गरेको छ ।

जोशीले अमेरिकामा छँदा चेज बैंकबाट आफ्नो क्रेडिट कार्डको दूरुपयोग गरी नेपालमा डलर पठाएका थिए । अरू व्यक्तिकाे चिठ्ठा रकम दुरूपयाेग गरेपछि उनी रातारात भागेर काठमाडौं आएका थिए । त्यसपछि अमेरिकी सरकारले निजमाथि आवश्यक कारबाहीको लागि धेरै पटक पत्राचार गरेको थियो ।

सोही क्रममा अमेरिकाको डिपार्टमेण्ट अफ जस्टिसले २००९ को अक्टोबर ३० मा नेपाल सरकारलाई निजबिरुद्ध अमेरिकामा चलेको मुद्दा र उसका हर्कतको विवरण पठाएको थियो ।