राष्ट्रपति कार्यालयले मेलम्चीको पानी झार्ने साइत जुरायो, २३ गते पानी पाइने

मेलम्चीको पानी काठमाडौं उपत्यकामा औपचारिक वितरणको निम्ति राष्ट्रपति कार्यालयले उद्घाटनको साइत जुराएको छ ।

यसअघि काठमाडौं उपत्यका खानेपानी लिमिटेडले तय गरेको १५ गते पूर्णिमाको दिनलाई विभिन्न कारण देखाउँदै चैत २० गते भनिएको थियो ।

तर,शुभबार र शुभसाइत नपरेको भन्दै शीतल निवासले २३ गते सोमबार शीतलाष्टमीको दिन रोजेको बताइन्छ । स्रोत भन्छ ‘१५ बाट २० गते सारिएको थियो तर शुभबार नपरेकाले उतैबाट २३ गतेलाई प्रस्ताव गरिएको छ ।’

राष्ट्रपतिले काठमाडौंमा मेलम्चीको पानी धाराबाट झारेर उद्घाटन गर्ने कार्यक्रम अब चैत २३ गतेलाई तय भएको हो । उद्घाटन गरिएको धाराबाट सँधै पानी झार्नेगरी भृकुटीमण्डपमा धारा बनाउने काम हिजोदेखि धमाधम भइरहेको छ । राष्ट्रपति विद्यादेवी भण्डारीले त्यहिँबाट औपचारिक उद्घाटन गर्ने कार्यक्रम तय गरिएको बताइन्छ । केयुकेलका अनुसार १५ गतेसम्म सुन्दरीजलमा दैनिक ४ करोड लिटर पानी आइपुग्ने छ ।

त्यसपछि हरेक दिन १ करोडको दरले बढ्ने छ । पाइपमा समस्या आउने डरले एक हप्तापछि मात्र पूरा क्षमताको १७ हजार लिटर पानी सुन्दरीजलमा झर्नेछ । तत्काललाई उपत्यकामा रहेको पुरानै वितरण प्रणालीबाट घर घरमा पानी पठाइने कम्पनीले जानकारी दिएको छ ।

शुक्रबार सुन्दरीजलको खानेपानी ट्रिटमेण्ट प्लाण्टमा पानी खसालिएको छ । अनौपचारिक रुपमा आजै अपरान्ह ४ बजेबाट मेलम्चीको पानी काठमाडौंका खानेपानी पाइपमा बग्न थालेकाे छ ।