लमजुङको जमिन थर्किएको थर्कियै,भूकम्पका घाइते बेशीशहर ल्याइँदै

अत्यधिक जलबिध्युत उत्पादन क्षमता रहेको पहाडी जिल्ला लमजुङको पर्यटकीय मर्स्याङ्दी गाउँपालिका–३ भुलभुले केन्द्रविन्दु बनाएर आज बिहान पाँच दशमलव आठ रेक्टर स्केलको भूकम्प गएको छ ।

जमिन थर्कने क्रम रोकिएको छैन ।“आफ्टर सक हो कि बिफोर सक हो भन्न सकिन्न,तर थर्काइ जारी छ ।”,उध्दारमा खटिएका जिल्ला प्रहरी प्रमुख गङ्गा थापाको अनुभव यस्तो छ । घर भत्किँदा विभिन्न स्थानका पाँच जना घाइते भएका छन् ।

घाइते हुनेमा बेसीशहर नगरपालिका–६ की ३६ वर्षीय उमा गुरुङ,वडा नं ११ चितीका ८३ वर्षीय खकाकुमारी पाण्डे,वडा नं ८ का २९ वर्षीय खुशीमाया गुरुङ र मर्स्याङ्दी गाउँपलिका–६ ठूलीबेँसीका २२ वर्षीय गोविन्द अधिकारी रहेको जिल्ला प्रहरी कार्यालय लमजुङले जनाएको छ । प्रहरीका अनुसार उनीहरुमध्ये खुशीमाया र गोविन्द भने भाग्ने क्रममा चोट लाग्न पुगी घाइते भएका थिए ।

घाइतेहरुको जिल्ला अस्पतालमा उपचार भइरहेको छ । टाउको, हातखुट्टालगायतमा चोट लागेको हो । घाइते उमा घरमै सुतिरहेको बेला भूकम्प जाँदा घर भत्किएर शरीरको आधा भाग पुरिएको थियो । त्यसपश्चात् स्थानीयवासीले उध्दार गरेर एम्बुलेन्समार्फत जिल्ला अस्पताल पुर्याउन सफल भएको तर प्रहरीलाई बेलैमा खबर गर्दासमेत नआएको स्थानीयवासीको गुनासो छ ।

उमासहित छोरी श्रुती गुरुङ सोही स्थानमा सुतिरहे पनि उनी भने मर्निङवाक जाने भनेर हिँडेको एक मीनेटमै भूकम्प गएको थियो । श्रुती मर्निङवाक जाने भनेर घरबाट हिँडेकाले घाइते हुनबाट जोगिएको उहाँले बताउनुभयो ।

श्रुतीले भन्नुभयो, “घरमा ममी र म मात्र थियौँ,बाबा कामको सिलसिलामा मनाङमा हुनुहुन्छ,अब घर भत्कियो कता कसरी बस्ने भइरहेको छ ।”