एमालेबाट थप एक दर्जन नेता निश्कासनको तयारी

नेकपा एमालेले १२ जना नेतालाई आजैका मितिदेखि लागू हुनेगरी साधारण सदस्यताबाटै निश्कासन गर्न लागेकोमा स्थायी समितिको बैठक स्थगित भएकोले भोलि बिहानसम्मलाई सरेको छ ।

आज रातभरमा केहीलाई फकाउने तयारी भएकोले समयअभावको कारण बैठक सारिएको बताइन्छ । स्थायी समितिले यसअघि नै कारवाही,नियुक्ति,पुरस्कार,पदोन्नतिलगायत यावत निर्णय गर्ने अधिकार अध्यक्षलाई सुम्पिएवमोजिम उहाँले निर्णय गरिसकेर भोलि सुनाउने कार्यक्रम हो ।

प्रधानमन्त्री तथा एमाले अध्यक्ष केपी शर्मा ओलीद्वारा निकालिएका (स्थायी समितिले औपचारिकता दिन बाँकी) नेताहरुमा उपमहासचिव घनश्याम भुसाल,स्थायी समिति सदस्य सुरेन्द्र पाण्डेलगायत प्रतिनिधिसभाका प्रत्यक्ष निर्वाचित सदस्यहरु हुनुहुन्छ ।

आजै निकाल्न लागिएका अन्य नेतामा भवानी खापुङ,यज्ञराज सुनुवार,विरोध खतिवडा,जीवनराम श्रेष्ठ, कृष्णलाल महर्जन,सोमप्रसाद पाण्डे,मेटमणि चौधरी,झपट रावल,दिपकप्रकाश भट्ट र नारायण खतिवडा हुनुहुन्छ । उहाँहरुलाई अध्यक्षका हरेक काममा साथ नदिएको आरोप लगाउँदै २४ घण्टे स्पस्टिकरण सोधिएको थियो । तर,उहाँहरु कसैले पनि जवाफ दिनुभएको थिएन ।

यसअघि वरिष्ठ नेताद्वय माधवकुमार नेपाल,झलनाथ खनाल र उपाध्यक्ष भीम रावलसहित ११ जना र आज १२ जना गरी २३ जना नेतालाई पार्टीबाट निश्कासन गरिएको हो । यसबीच नेपाल-खनाल समूहमा रहनुभएका भनिएका योगेश भट्टराई,गोकर्ण बिष्ट र गणेश पहाडीलाई भने कारबाही गरिएको छैन ।