निषेधाज्ञा उल्लंघन गर्ने ३४ सय बढी सवारी साधन नियन्त्रणमा

विभिन्न जिल्लामा लागू गरिएको निषेधाज्ञा कार्यान्वयनको सिलसिलामा पछिल्लो २४ घण्टामा निषेधाज्ञा उल्लंघन गर्ने ३ हजार ४ सय ४१ वटा सवारी साधनलाई प्रहरीले नियन्त्रणमा लिएको छ । तीमध्ये ९ सय १३ वटा चार पाङ्ग्रे र २ हजार ५ सय २८ वटा मोटरसाइकल रहेका छन् । नियन्त्रणमा लिएका सवारी साधनहरुलाई आवश्यक सोधपुछपछि छाडिएको बताइएको छ ।

साथै नेपाल प्रहरीद्वारा सञ्चालित ‘तपाईंको मास्क खोई ?’ कार्यक्रमअन्तर्गत पछिल्लो २४ घण्टामा २ सय ४ जनालाई निःशुल्क मास्क वितरण गरिएको छ । हालसम्म जम्मा ४ लाख ५७ हजार २० जनालाई निःशुल्क मास्क वितरण गरिएको जानकारी दिइएको छ ।

यसबीचमा निषेधाज्ञा उल्लंघन गर्ने २ सय ३३ जनालाई कोभिड–१९ सङ्कट व्यवस्थापन अध्यादेश, २०७८ बमोजिम २३ हजार ३ सय रुपैयाँ जरिवाना गरिएको छ । सो क्रममा २ हजार ५ सय ७२ जनालाई सम्झाई बुझाई छाडिएको छ । त्यसैगरी माईकिङ, प्लेकार्ड, पर्चापम्प्लेट सहितको ६१ वटा सचेतनामूलक कार्यक्रमअन्तर्गत ३ हजार ६ सय १० जनालाई सचेत समेत गराइएको छ ।