सशस्त्रका एसएसपी राष्ट्रसंघको उपल्लो तहमा पुग्दै

संयुक्त राष्ट्रसंघको प्रोटेक्सन अफ सिभिलियन साईट कोअर्डिनेटर पदमा सशस्त्र प्रहरी बल नेपालका वरिष्ठ उपरीक्षक (एसएसपी) सुरेशकुमार श्रेष्ठ छानिएका छन् । ग्लोबल भ्याकेन्सीअन्तर्गत खुल्ला प्रतिस्पर्धाबाट उत्कृष्ट ठहरिएर उनी छनौट भएका हुन् ।

दक्षिणी सुडानस्थित राष्ट्रसंघीय शान्ति स्थापना मिसनमा रिक्त पिओसी कोअर्डिनेटर (पी ४) को निम्ति गत सेप्टेम्बरमा संयुक्त राष्ट्र संघको प्रहरी डिभिजनले गरेको विज्ञापनमा नेपालको तर्फबाट श्रेष्ठले प्रतिस्पर्धा गरेका थिए । धेरै वटा मुलुकका प्रतिस्पर्धीमध्ये परीक्षाका विभिन्न चरण र अन्तर्वार्तापश्चात् उनलाई छनौट गरिएको हो ।

दक्षिणी सुडानको शान्ति मिसनअन्तर्गत यो तहका कुनै पनि पदमा नेपाली अधिकृतहरु छनौट भएको यो नै पहिलो पटक हो । श्रेष्ठ सशस्त्र प्रहरी बलको खुल्ला प्रतिस्पर्धाबाट सो पदमा छनौट भएका अधिकृतहरुमध्ये समेत पहिलो भएका छन् । 

उनी सशस्त्र प्रहरी बल स्थापनापश्चात पहिलो ब्याचको निरीक्षक पदमा सेवा प्रवेश गरेर सर्वोत्कृष्ट भएका थिए । उनले यसअघि साउथ सुडान मिसनमा एक वर्ष एफपीयू कमाण्डरको रुपमा काम गरिसकेका छन् । 

त्यसैगरी संयुक्त राष्ट्रसंघ शान्ति स्थापना मिसन लाइबेरिया र राष्ट्र संघको सहयोग मिसन इराकमा समेत नेपालको प्रतिनिधित्व गरेर काम गरिसकेका छन् । हाल सशस्त्र प्रहरी बलको कमाण्डेण्ट तालिम केन्द्र पोखरामा कार्यरत छन् । डिआइजी बढुवाको मुखैमा सँगठन र  तालुकवाला मन्त्रालयले उनलाई फुली थपेर अझ इज्जतिलो हिसाबले काम गर्न हौसला देला या यहाँनेर पनि छिर्केदाउ चल्ला !