उता एसपी तानिने,यता ३५ लाखको चिनी समातिने

पश्चिम नवलपरासीबाट अस्ति राति दुई वटा पिकअपमा राखेर नेपालतर्फ ल्याइँदै गरेको ६० क्विण्टल अवैध चिनी सशस्त्र प्रहरीले समातेको छ । तस्करीको उक्त चिनी त्यहाँका एसपीलाई हेडक्वार्टरले आवश्यक सोधपुछ र छानबिनको निम्ति हेडक्वार्टरमा तानेलगत्तै डिसपीको नेतृत्वमा बरामद भएको हो ।

राति १० बजेको समयमा नम्बर २६ गण हेडक्वार्टरबाट इन्सपेक्टर किशोर डाँगीको नेतृत्वमा खटिएको ११ जनाको मोबाइल टोलीले चिनी बरामद गरेको बुझिएको छ । सरावल गाउँपालिका ५,धनगडवामा भारतबाट दुई वटा पिकअपमा राखेर नेपालतर्फ ल्याइएको चिनी र सवारी साधनलाई नियन्त्रणमा लिइएको हो ।

चौंतिस लाख दुई हजार मूल्यको छ हजार केजी चिनीसहित लु.१ च ५९६३ र लु.२ च ६५५३ नम्बरको पिकअपका सवारी चालकहरुलाई पनि सशस्त्रले पक्रेको छ । पक्राउ पर्नेमा सोही जिल्लाको प्रतापपुर गाउँपालिका २,घोडाहा बस्ने ४५ वर्षका धीरेन्द्रकुमार चौधरी, सह–चालक २० वर्षका किरणकुमार चौधरी र रामग्राम नगरपालिका ७, उजैनी बस्ने १६ वर्षका रोशन चौधरी रहेको भन्सार कार्यालयले जनाएको छ । 

चिनी र सवारी साधनलाई हिजै दिउँसो रुपन्देहीको बेलैया भन्सार कार्यालयमा बुझाइएको छ । 

त्यहाँका एसपी रुपकुमार क्षेत्री विभिन्न विवादमा मुछिएपछि काठमाडौं तानिएका छन् । उनको ठाउँमा केही दिनदेखि डिएसपी केशवराज थापाले निमित्त भएर काम चलाइरहेका छन् ।

एसपी तानिनेबित्तिक्कै डिएसपीले निमित्त भएर चलाएको गणले ३४ लाख बढीको चिनी र सवारी साधन समात्नु सामान्य कुरा हुनै सक्दैन । यसबाट पनि एसपीकै सँरक्षणमा निर्वाध तस्करी धन्दा चल्ने गरेको प्रष्ट हुने भन्सार बिभागबाट भर्खरै तानिएका महानिर्देशक कमल भट्टराईले बताए ।  स्रोतका अनुसार भारतमा सर्वसाधारणलाई उपलब्ध गराइने अनुदानको चिनी नेपालतर्फ तस्करी हुने गरेको छ । भारत सरकारले सर्वसाधारणलाई मल जस्तै चिनी पनि अनुदानमा बाँड्ने गर्दछ । 

भारतीय बजारमा मोटामोटी नेपाली रुपैयाँ ६० मा एक किलोग्राम चिनी पाइन्छ । यता त्यही चिनीलाई ८५ रुपैयाँ पर्छ । भारतबाट तस्करी गरेर यता ल्याउने गरिएको त्यस्तो चिनीले स्वदेशी चिनी उद्योग संकटमा परेका छन् भने सरकारको राजश्वसमेत चौपट हुने गरेको छ । त्यो चिनी प्रधानमन्त्री शेरबहादुर देउवाको ३ बर्षसम्म अङ्गरक्षक रही ३ महिनाअगाडि मात्र नवलपरासी पठाइएका इन्स्पेक्टर रामहरि श्रेष्ठ इन्चार्ज रहेको नाकाबाट भित्रिएको हो । उनी पनि एसपी रुपकुमारसङ्गै अनुसन्धानको निम्ति हेडक्वार्टरमा तानिएका छन् । सत्ताको आडमा हुने गरेका यस्ता बदमासी त कति छन् कति ! ब्यक्ति मोटाउने,रास्ट्र बदनाम हुने !