मनोहरा पुलमा विप्लव समूहको नाराबाजी

काठमाडौं र भक्तपुर जोड्ने अरनिको राजमार्गस्थित मनोहरा पुलमा नेकपा विप्लव समूहले नाराबाजी गरेको छ । आज बिहान कार्यालय समयमा गरिएको नाराबाजीले सवारी साधनको आवागमन अवरुद्ध भएको बताइन्छ । 

जडिबुटी नजिकैको मनोहरा पुलमा उनीहरुले बिहान साढे १० बजेको समयमा नाराबाजी गरेका थिए । पार्टीका भक्तपुर जिल्ला सेक्रेटरी ऐनबहादुर शाहीको नेतृत्वमा झण्डै एक दर्जन नेता तथा कार्यकर्ताले मुश्किलले एकाध मीनेट नाराबाजी गर्दै सवारी आवागमन अवरुद्ध पारेका हुन् । 

लगत्तै प्रहरी टोलीले उनीहरुलाई तितरवितर पारेको थियो । प्रहरी देखेपछि ती सबै काठमाडौंको नरेफाँटतर्फ कुदेको बताइन्छ । उनीहरुले नेपाल कम्युनिष्ट पार्टी जिन्दाबाद,राजबन्दी रिहा गर,एकीकृत जनक्रान्ति जिन्दावाद, तीन बुँदे सहमति लागू गर र झुठा मुद्दा खारेज गरलगायत नारा घन्काएका थिए ।