देउवालाई बधाई दिन माओवादी नेता पुष्पगुच्छा लिएर बालुवाटारमा

 नेकपा माओवादी केन्द्रका नेता तथा अर्थमन्त्री जनार्दन शर्माले कांग्रेस संसदीय दलको नेतामा निर्वाचित प्रधानमन्त्री शेरबहादुर देउवालाई बधाई तथा शुभकामना दिनुभएको छ । 

देउवा संसदीय दलमा निर्वाचित भएलगत्तै प्रधानमन्त्रीको सरकारी निवास बालुवाटार पुगेर शर्माले पुष्पगुच्छासहित बधाई तथा शुभकामना व्यक्त गर्नुभएको हो । शर्माले सामाजिक सञ्जालमा पनि शुभकामना संदेश लेख्नुभएको छ ।  एक घण्टाअघि उहाँले लेख्नुभएको छ, 'सम्माननीय प्रधानमन्त्री एवं नेपाली कांग्रेसका सभापति श्री शेरबहादुर देउवा संसदीय दलको नेतामा निर्वाचित हुनु भएकोमा हार्दिक बधाई तथा सफल कार्यकालको शुभकामना ब्यक्त गर्दछु ।'

आज बिहान भएको निर्वाचनमा महामन्त्री गगन थापालाई भारी मतले हराउँदै देउवा कांग्रेस संसदीय दलको नेतामा निर्वाचित हुनुभएको हो । ८९ सदस्यीय संसदीय दलमा देउवाले ६४ मत ल्याएर नेतामा निर्वाचित हुँदा थापाले २५ मत पाउनुभएको छ । 

सत्ता गठबन्धनका अन्य दलहरु देउवाको पक्षमा रहेको चर्चाका बीच माओवादी नेता शर्मा बधाई दिन बालुवाटार पुग्नुभएको हो ।