आकाश खुल्नेबित्तिक्कै पत्रकारहरुको हुल सुर्खेततिर

आज बिहानदेखि बन्द रहेका अधिकांश विमानस्थलमध्ये पहाडी क्षेत्रका केही खुलेका छन् । बाक्लो हुस्सुका कारण काठमाडौंको त्रिभुवन अन्तर्राष्ट्रिय विमानस्थलमा समेत आज बिहान १० बजेसम्म कुनै पनि विमान अवतरण र उडान हुन सकेको थिएन । 

अहिले आकाश बिस्तारै खुल्न थालेपछि उडान शुरु गर्न लागिएको छ । सुर्खेतमा हुन लागेको नेपाल पत्रकार महासंघको केन्द्रीय साधारण सभामा भाग लिन हिँडेका पत्रकारहरुको एउटा टोली भर्खरै काठमाडौंबाट त्यसतर्फ प्रस्थान गरेको छ । साधारण सभामा उद्घाटन सत्रको प्रमुख अतिथि राष्ट्रपति विद्यादेवी भण्डारीलाई आमन्त्रण गरिएको बताइएको छ । उहाँ आज बुटवल बसेर भोलि बिहान ९ बजे सैनिक हेलिकप्टरबाट सुर्खेत पुग्ने कार्यक्रम छ ।