मन्त्री चौधरीको निर्देशनपछि धोबिखोला करिडोरमा पिच शुरु

शहरी विकासमन्त्री मेटमणि चौधरीले जतिसक्दो छिटो धोबिखोला करिडोरको अधुरो काम अघि बढाउन निर्देशन दिएपछि धमाधम पिच गर्न थालिएको छ । मन्त्री चौधरीको निर्देशनपछि काठमाडौं उपत्यका विकास प्राधिकरणले काम अघि बढाएको बताइएको छ ।

‘करिडोरमा अवरोध हटाउन र अधुरा काम तत्काल अगाडि बढाउन मन्त्रीको निर्देशबमोजिम बाँकी काम अघि बढाइएको छ । अब छिट्टै नै धोबिखोला करिडोर सुधार आयोजनाको कामले अन्तिम रुप पाउने छ’, विकास आयुक्त जानुका ढकालले भनिन् ।

आज अनुगमनको क्रममा नदी अतिक्रमण गरी बनाएका संरचना भत्काउन, फुटपाथको अवरोध हटाउन र कालोपत्रे थप्नुपर्ने ठाउँमा तत्काल काम अघि बढाउन मन्त्री चौधरीले प्राधिकरण र मातहतका निकायलाई निर्देश गर्नुभएको थियो । 

‘बुद्धनगरको आर्क ब्रिजदेखि धोबिखोला करिडोरमा बाँकी रहेको काम पूरा हुँदैछ । जसअन्तर्गत साढे एक किलोमिटर बाटोमा ओभर लेयिङ्ग र केही मर्मतका काम हुँदैछ’, जिल्ला आयुक्त जगदिश लामिछानेले भने,‘रोड मार्क पेन्टिङ, रेलिङमा कलर लगाउनेदेखि नदी किनारमा रहेका विरुवाको संरक्षणसम्मको काम भइरहेको छ ।’गत वर्ष बाँकी रहेको काम अन्तिम चरणमा पुगेको उनले जानकारी दिए ।