पाकिस्तानको बधाई पनि शपथ अगावै

हिजो साँझ प्रधानमन्त्रीमा नियुक्त हुनुभएका नेकपा माओवादी केन्द्रका अध्यक्ष पुष्पकमल दाहाल (प्रचण्ड) लाई पाकिस्तानका प्रधानमन्त्री शेहबाज शरिफले बधाई तथा शुभकामना दिनुभएको छ । नेकपा एमाले, माओवादी, राष्ट्रिय स्वतन्त्र पाटी, राप्रपा, जनता समाजवादी पार्टी, जनमत पार्टी र नागरिक उन्मुक्ति पार्टीको समर्थनमा प्रधानमन्त्री हुनुभएका प्रचण्डलाई शरिफले बधाई दिनुभएको हो । 

आफ्नो ट्विटरमा शरिफले लेख्नुभएको छ,‘पुष्पकमल दाहाललाई नेपालको प्रधानमन्त्री बन्नु भएकोमा हार्दिक शुभकामना । क्षेत्रीय साझेदारको हैसियतमा पाकिस्तान र नेपालबीच सौहार्दपूर्ण सम्बन्ध छ । म उहाँसँग द्विपक्षीय सम्बन्ध र क्षेत्रीय सहयोगलाई थप सुदृढ पार्ने कामको निम्ति तत्पर छु ।’

मुलुकको ४४ औं प्रधानमन्त्रीमा नियुक्त हुनुभएका प्रचण्डलाई भारत र चीनले हिजै राति बधाई दिइसकेका छन् । त्यस्तै, अमेरिकाले पनि उहाँलाई  आज बिहान शुभकामना दिएको हो । प्रचण्डलाई आज अपरान्ह ४ बजे राष्ट्रपति विद्यादेवी भण्डारीले राष्ट्रपति कार्यालय, शीतल निवासमा प्रधानमन्त्री पद र गोपनीयताको शपथ ग्रहण गराउने कार्यक्रम छ ।