देउवाको नाडी छाम्दै आरजू

अन्तिम क्षणमा राजनीतिक कोर्सले नयाँ रुप लिएपछि राजनीतिक रुपमा पार्टीभित्र र बाहिर अप्ठेरो स्थितिमा पुग्नुभएका निवर्तमान प्रधानमन्त्री शेरबहादुर देउवा र उहाँकी श्रीमती डा. आरजु राणासम्बन्धी फोटो र भिडियो सामाजिक सञ्जालमा सबैभन्दा धेरै पोष्ट भएका छन् । ती फोटो र भिडियोमा उहाँहरुलाई व्यङ्ग्य कसिएको छ ।

काँग्रेस नेतृत्वको सत्ता गठबन्धन टुटेर एमालेको समर्थनमा माओवादी अध्यक्ष प्रधानमन्त्री बनिसक्नुभएको छ । विशेषगरी देउवा र उहाँकी श्रीमती आरजुको अडानका कारण गठबन्धन भाँडिएको काँग्रेसीहरुले समेत सामाजिक सञ्जालमा लेखेका छन् ।

डा. राणाको राजनीतिकलगायत धेरै महत्वाकांक्षाले सीमा नाघेपछि निवर्तमान प्रधानमन्त्री तथा पार्टी सभापति देउवा निरीह हुनुभएको अर्थ लगाउन थालिएको छ । सोही विषयलाई लक्षित गर्दै सामाजिक सञ्जालमा केही वर्षअगाडिको एउटा फोटो सेयर गरिएको छ ।

फोटोमा अस्वस्थ हुनुभएका देउवाको श्रीमती राणाले ब्लड प्रेसर नाप्दै गरेको देखिन्छ । बेडरुममा खिचिएको उक्त तस्बिरलाई वर्तमान सन्दर्भसँग जोड्दै लेखिएको छ, ‘नाडी छाम्दाछाम्दै क्रमशः झाडी र अन्ततः गोल्खाडी ।’