प्रचण्ड आजै राति बालुवाटार सर्दै

प्रधानमन्त्री पुष्पकमल दाहाल प्रचण्ड आज राति नै सरकारी निवासमा सर्न लाग्नुभएको छ । उहाँ राति खुमलटारबाट बालुवाटार सर्ने पारिवारिक स्रोतले बतायो । 

‘सार्ने तयारी भएको छ, सम्भवतः आज अबेर सम्ममा सम्माननीयज्यूको निवास सराइ हुनेछ,’ सोही स्रोतले भनेको छ । उहाँले आइतबार प्रधानमन्त्रीमा नियुक्त भएर सोमबार शीतल निवासमा शपथग्रहण गर्नुभएको थियो ।

तर,निवर्तमान प्रधानमन्त्री शेरबहादुर देउवा आज बिहानसम्म बालुवाटारमा बसेका कारण प्रधानमन्त्री दाहाल खुमलटारको घरबाट आउजाउ गर्न बाध्य हुनुभयो । देउवा आज बिहान ११ बजेर २० मीनेटको साइतमा धुम्बाराहीस्थित आलिशान डेरामा सर्नुभएको छ । 

बूढानीलकण्ठस्थित निवास पुनर्निर्माण भइरहेकाले उहाँ कम्तिमा ६ महिना डेरामा बस्न लाग्नुभएको हो ।