‘र’ का नेपाल प्रमुखले गरे प्रधानमन्त्री निवासको दैलोमा भेट

भारतीय खुफिया एजेन्सी ‘र’ का नेपाल प्रमुख नयाँ दिल्लीबाट फर्केलगत्तै नेपाली टेलिभिजन पत्रकारहरुसँग एक घण्टा छलफल गरेका छन् । हिजो दिउँसो १ बजे काठमाडौ उत्रेलगत्तै राघवले बालुवाटारमा पत्रकारहरुसँग कुराकानी गरेका हुन् ।

उनी नेपाल वायुसेवा निगमको उडान नम्बर आरए २०६ बाट दिउँसो काठमाडौं आएलगत्तै बालुवाटारमा प्रधानमन्त्रीको सरकारी निवास सामुन्नेको चिया पसलमा पुगेका थिए । प्रधानमन्त्री निवासको ३ नम्बर गेट सामुन्ने चियापान रेष्टुरेन्टमा उनी २ बजे छिरेको बताइन्छ । 

उनीभन्दा झण्डै १५ मीनेट अगाडिदेखि त्यहीँ रहेका ग्यालेक्सी टेलिभिजनका दुई जना पत्रकारसँग उनले त्यसपछि ३ बजेसम्म छलफल गरेका थिए । ग्यालेक्सी टेलिभिजनको कार्यालय प्रधानमन्त्री निवासबाट मुश्किलले एक सय मीटर पश्चिममा छ ।

भट्नागर पुस १३ गते बिहान काठमाडौंको पछिल्लो राजनीतिक अवस्थावारे जानकारी गराउन नयाँ दिल्ली गएका थिए । उनी फर्कने भनिएको मितिभन्दा दुई दिन ढिलो काठमाडौं आएका हुन् ।