हिजो बढुवा, आज कुममा फूली

नेपाल प्रहरीको प्राविधिकतर्फ वरिष्ठ उपरीक्षक (एसएसपी) बाट नायव महानिरीक्षक (डिआईजी)मा पदोन्नति भएका तीन जनालाई दर्ज्यानी चिन्ह प्रदान गरिएको छ । 

प्रहरी महानिरीक्षक वसन्तबहादुर कुँवरले प्रहरी प्रधान कार्यालयमा आयोजित एक समारोहमा उनीहरुलाई आज दर्ज्यानी चिन्ह लगाइदिएका हुन् । 

डा. दामोदर पौडेल, डा. मनोजकुमार यादव र डा. सञ्जिता दाहाललाई दर्ज्यानी चिन्ह लगाइएको हो । गृहमन्त्री रमेश लेखकको मन्त्रीस्तरीय निर्णयबाट हिजो उनीहरु एसएसपीबाट डिआईजीमा बढुवा भएका हुन् । 

समारोहमा आईजीपी कुँवरले बढुवा भएका प्रहरी अधिकृतहरुलाई बधाई दिँदै आगामी दिनमा पनि उत्कृष्ट जिम्मेवारी निर्वाह गर्न निर्देशन दिए । उनले प्रहरीमा विभिन्न प्राविधिक समूहले पुर्याएको योगदानको प्रशंसा पनि गरे ।