काँग्रेसले आज साँझ सुदूरपश्चिमको नेता छान्ने

नेपाली काँग्रेसले आज सुदूरपश्चिम प्रदेश सभामा संसदीय दलको नेता चयन गर्दैछ । उपसभापति लोकराज अवस्थीको संयोजकत्वमा गठित पाँच सदस्यीय निर्वाचन समितिले निर्वाचन कार्यतालिका सार्वजनिक गरेको छ । 

जसअनुसार दिउँसो १२ बजे मतदाता नामावली प्रकाशन गरिएको छ । साढे १२ बजे मतदाता नामावलीउपर दाबी विरोध, १ बजे अन्तिम नामावली प्रकाशन गरिएको छ । साढे १ बजेदेखि साढे २ बजेसम्म उम्मेदवारका लागि दरखास्त दिने समय तोकिएको छ । उम्मेदवारको प्रथम नामावली आजै दिउँसो २ बजेर ४५ मीनेटमा प्रकाशन गरिनेछ । 

साढे ३ बजेसम्म उम्मेदवारको दरखास्तउपर दाबी विरोध गर्न सकिने जनाइएको छ । ४ बजेभित्र दाबी विरोधउपर जाँचबुझ गरी उम्मेदवारको दोस्रो नामावली प्रकाशन गर्ने कार्यतालिकामा उल्लेख छ ।

 

४ बजेदेखि ५ बजेसम्म मतदान अवधि तोकिएको छ । मतदान काँग्रेस सुदूरपश्चिम कार्यसमितिको कार्यालय परिसरमा हुनेछ ।