सुदूरमा सरकार गठन गर्न तातो लाग्यो,रेशम भएनन् टसको मस

सुदूरपश्चिम प्रदेशका प्रमुख देवराज जोशीले सरकार गठनका लागि दाबी पेश गर्न आह्वान गरेसँगै सत्ताको जोडघटाउ शुरु भएको छ । सत्ता र प्रतिपक्ष दुवै गठबन्धनसँग सरकार बनाउन आवश्यक बहुमत नभएकाले तानातानको अवस्था बनेको हो । 

प्रदेश प्रमुखले दुई वा दुईभन्दा बढी दलको समर्थनमा बहुमत जुटाएर सात दिनभित्र सरकारमा दावी प्रस्तुत गर्न आज प्रदेशसभामा प्रतिनिधित्व गर्ने राजनीतिक दलहरुलाई आह्वान गरेका छन् । आगामी पुस २७ गते आइतबार साँझ ५ बजेभित्र मुख्यमन्त्री पदमा दाबी पेश गर्न प्रदेश प्रमुख जोशीले सूचना जारी गरेका छन् । 

तर,केन्द्रमा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारलाई समर्थन गरेको नागरिक उन्मुक्ति पार्टीको तटस्थ बस्ने निर्णयले त्यहाँ सरकार नै नबन्ने अवस्था छ । सरकार गठनका लागि निर्णायक सिट लिएर बसेको उन्मुक्ति पार्टीको कसैलाई पनि समर्थन नगर्ने निर्णयले सरकार गठन प्रक्रिया नै अन्यौलमा परेको हो । 

५५ सदस्यीय प्रदेशसभामा सरकार गठनका लागि २७ सांसदको समर्थन आवश्यक हुन्छ । केन्द्रमा गठबन्धन गरेका माओवादी,एमाले र राप्रपाको कूल सीट २२ छ । जुन,बहुमतका लागि पर्याप्त संख्या होइन । त्यसैगरी प्रदेशसभामा ठूलो दल रहेको नेपाली कांग्रेस र नेकपा एकीकृत समाजवादी मिलेको अवस्थामा पनि बहुमत पुग्ने सम्भावना छैन । प्रदेशसभामा कांग्रेसका १९ र  नेकपा एसका चार सांसद छन् । नागरिक उन्मुक्ति पार्टीसँग ७ सीट छ । यो संख्या सत्ता र प्रतिपक्ष दुबै गठबन्धनका लागि बहुमत पुर्याउन पर्याप्त हुन्छ ।