एक ट्रक लोकल रक्सी प्रहरीको कब्जामा

पर्सामा घरेलु मदिराको ट्रकसहित एक युवक पक्राउ परेका छन् । वीरगञ्ज महानगरपालिका–३०, प्रसौतीपुर बस्ने २८ वर्षीय सदाम हुसेनलाई प्रहरीले ३९ पोका घरेलु मदिरा हालिएको मालवाहक ट्रकसहित समातेको हो । 

जिल्ला प्रहरी कार्यालय पर्साबाट खटिएको टोलीले महानगरको वडा नम्बर २ श्रीराम हल पछाडिको खाली चौरमा ना.६ ख.७२६ नम्बरको मालवाहक ट्रकभित्र लुकाई राखेको ३९० लिटर घरेलु मदिरा तथा विभिन्न औषधि बरामद गरेको हो । प्रहरीका अनुसार मदिरा, औषधि र २० लाख मूल्य बराबरको उक्त ट्रकसमेत गरी करिब १ करोड ३४ लाख ४९ हजार बराबरको सामान बरामद भएको हो ।

पक्राउ परेका हुसेनमाथि थप अनुसन्धान भइरहेको प्रहरीले जानकारी दिएको छ ।