एक्लै कसैले नसक्दा मिलेर आउन मधेसमा म्याद

मधेस प्रदेशका प्रमुख हरिशंकर मिश्रले एक साताको समय दिएर मुख्यमन्त्रीमा दावी प्रस्तुत गर्न प्रदेशसभामा प्रतिनिधित्व गर्ने राजनीतिक दलहरुलाई आह्वान गरेका छन् । आज विज्ञप्ति जारी गर्दै प्रदेश प्रमुखको कार्यालयले आगामी पुस २८ गते बिहीबार साँझ ४ बजेभित्र सरकारमा दावी पेश गर्न भनेको हो । 

मधेसमा कुनै पनि दलको एकल बहुमत नभएकाले गठबन्धनको सरकार बन्ने अवस्था छ । प्रदेश प्रमुखले पनि संविधानको धारा १६८ को उपधारा २ बमोजिम प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्रीमा दावेदारी पेश गर्न आह्वान गरेका छन् । 

मंसिर ४ मा सम्पन्न निर्वाचनबाट  मधेशमा नेकपा (एमाले) सबैभन्दा ठूलो पार्टी बनेको छ । १ सय ७ सदस्यीय प्रदेशसभामा एमाले २३, नेपाली कांग्रेस २२,जसपा १६,सिके राउत नेतृत्वको जनमत पार्टी १३, माओवादी केन्द्र ९, लोसपा ९ र एकीकृत समाजवादीका ७ सांसद छन् ।

 

संघमा सत्ता साझेदारी गरेका दलहरु मिलेको अवस्थामा यहाँ उनीहरुकै नेतृत्वमा सरकार गठन हुने सम्भावना छ ।