अघिल्लो दिन शीर्ष नेताले बोल्ने, भोलिपल्ट विश्वासको मत माग्ने

प्रतिनिधिसभामा प्रतिनिधित्व गर्ने राजनीतिक दलहरुको संयुक्त बैठकले पुस २५ गतेदेखि आरम्भ हुने संसद अधिवेशनको कार्यतालिका तय गरेको छ । आज संसद भवन बानेश्वरमा बसेको सर्वदलीय बैठकले कार्यतालिका निर्धारण गरेको हो । 

जसअनुसार अधिवेशन शुरु भएको दिन दलका शीर्ष नेताहरुले संसद बैठकलाई सम्बोधन गर्नेछन् । भोलिपल्ट पुस २६ गते प्रधानमन्त्री पुष्पकमल दाहाल प्रचण्डको आग्रहअनुसार विश्वासको मत लिने तयारी छ । 

केही दिनअघि प्रधानमन्त्री प्रचण्डले पुस २६ पुस गते प्रतिनिधिसभा बैठकमा विश्वासको मत लिने व्यवस्था मिलाउन संघीय संसद सचिवालयलाई पत्राचार गर्नुभएको थियो । सोहीअनुसार आजको सर्वदलीय बैठकले यसलाई सदनको कार्यसूचीमा राख्ने निर्णय गरेको हो । 

त्यस्तै माघ ७ गते सभामुखको निर्वाचन गर्ने प्रस्तावलाई सर्वदलीय बैठकले पास गरेको छ । प्रतिनिधिसभाका ज्येष्ठ सदस्य पशुपतिसमशेर जबराको आह्वानमा आज बैठक बसेको हो ।