केपी ओलीको गोजीमा मन्त्रीको नाम,कृष्णगोपाल नदोहोरिने

पर्सि प्रधानमन्त्री पुष्पकमल दाहाल प्रचण्डले संसदबाट विश्वासको मत लिएपछि मन्त्रिपरिषद विस्तार हुने भएकाले एमालेले सम्भावित सूचीलाई अन्तिम रुप दिन थालेको छ । यसअघि उपाध्यक्ष विष्णु पौडेलको नेतृत्वमा चार जना मन्त्री बनिसकेका छन् । तर मन्त्रालयको भागबण्डा नभएकाले दुई सातादेखि अर्थमन्त्रीबाहेक अरु बिनाविभागीय मन्त्रीको हैसियतमा क्वार्टरमा बस्न बाध्य छन् ।

सम्भवतः पर्सि साँझ बिस्तार हुने मन्त्रिमण्डलमा एमालेले ललितपुर २ का सांसद प्रेम महर्जनलाई पठाउने भएको छ । महर्जन मन्त्री बन्ने भएपछि काठमाडौं ९ बाट विजयी कृष्णगोपाल श्रेष्ठलाई यस पटक मन्त्रिमण्डलमा नपठाउने र महर्जनले नै उपत्यकाबाट नेवार समुदायको प्रतिनिधित्व गर्ने भनिएको छ । अध्यक्षको भनाइ उध्दृत गर्दै स्रोतले भनेको छ, ‘प्रेमलालले नै अब मन्त्रिमण्डलमा भ्याली र नेवार समुदायको प्रतिनिधित्व गर्छन् ।’ 

त्यसैगरी मकवानपुर २ का महेश बर्तौलालाई पनि एमाले अध्यक्ष ओलीले कुनै हालतमा मन्त्री बनाउनुपर्छ भन्दै सूचीमा रेजा लगाउनुभएको स्रोतको दाबी छ । बर्तौलाले गत आमनिर्वाचनमा एकीकृत समाजवादीका नेता तथा पूर्वमन्त्री विरोध खतिवडालाई पराजित गरेका थिए ।

यसअघि पुस ११ गते नै उपप्रधान तथा अर्थमन्त्री विष्णु पौडेल र मन्त्रीहरु दामोदर भण्डारी, ज्वालाकुमारी साह,राजेन्द्र राईले शपथ लिइसकेका छन् । विगतमा सञ्चारमन्त्री हुँदा विवादास्पद छवि बनाएका गोकुल बाँस्कोटा मन्त्री हुने सम्भावना कम रहेको बालकोट निकटस्थ कमरेडहरुको भनाइ छ ।
त्यसैगरी सभामुखमा छविलाल विश्वकर्मालाई रोज्ने सम्भावना  देखिएको छ । विश्वकर्मालाई उक्त पदमा चयन गर्दा दलितको प्रतिनिधित्व हुने ठहरका साथ लुम्बिनी र रुपन्देहीको एमाले राजनीतिमा बल मिल्ने अध्यक्ष निकटस्थहरुको बुझाइ छ ।

एमाले नेतृत्वले परिवार दलका अध्यक्ष एकनाथ ढकाललाई २ पटक माननीय बनाउनु पछाडिको कारण पनि पार्टीभित्र खुल्दै गएको छ । ढकालका कारण पार्टीको खर्च चलाउन व्यापारीहरुसँग हात फैलाइरहन नपर्ने एउटा सजिलो उपाय हो धने क्रिश्चियन मतदातालाई पनि रिझाउन सकिने भएकाले आगामी चुनावसम्म सकारात्मक प्रभाव पर्ने अध्यक्ष ओलीको विश्लेषण रहेको बताइन्छ ।

राष्ट्रिय स्वतन्त्र पार्टीका सभापति रवि लामिछानेलाई गृहमन्त्रालयको जिम्मेवारी दिँदाको फाइदाबारे पनि बालकोटमा राम्रैसँग छलफल हुने गरेको छ । नेपालमा रहेका र आउने तिब्बती शरणार्थीलाई परिचयपत्र दिएर अमेरिकाको चासोलाई सम्बोधन गर्न सकिने,अन्तर्राष्ट्रिय शक्ति केन्द्रको दबाबलाई ‘ब्यालेन्स’ गर्न सकिने उनीहरुको बुझाइ रहेको छ ।