तारुकामा यस वर्ष दुई दिन गोरु जुधाई,'वान भर्सेज वान' प्रतिष्पर्धा हुने

मकर सङ्क्रान्तिको अवसरमा नुवाकोटको तारुकामा यसवर्ष २८ हल गोरु जुधाइने भएको छ । तारकेश्वर गाउँपालिका–३ तारुकास्थित कटहरबोट पाटोमा हरेक वर्षझैँ यस वर्ष पनि गोरु जुधाउन लागिएको हो । 

‘माघे संक्रान्ति गोरु जुधाइ महोत्सव’ व्यवस्थापन समितिले गोरु जुधाउन इच्छुक किसानलाई पुस २३ गतेभित्र दर्ता गराउन सूचना गरेकोमा हिजोसम्म २८ हल गोरु दर्ता भएको गाउँपालिकाका उपाध्यक्ष हरिप्रसाद रिमालले जानकारी दिए । अघिल्ला वर्षजस्तै माघ १ र २ गते माघे सङ्क्रान्ति मेलाको अवसरमा गोरु जुधाइने उनले बताए । 

अघिल्ला वर्ष मेलाका रुपमा मनाइँदै आएको तर यस वर्ष ‘महोत्सव’ का रुपमा सञ्चालन गर्न लागिएको उपाध्यक्ष रिमालको भनाइ छ । गोरु जुधाइ प्रतिस्पर्धालाई व्यवस्थित, आकर्षक,रोचक र थप मनोरञ्जनात्मक बनाउन यस वर्ष दुई दिन जुधाउन लागिएको हो  ।

राष्ट्रिय तथा स्थानीय कलाकारमार्फत लोकदोहोरीलगायतका अन्य मनोरञ्जनका गतिविधिसमेत महोत्सवमा समावेश गरिने छ । माघे सङ्क्रान्तिको अवसरमा जुधाउन दर्ता भएका गोरुलाई एकले अर्कोसँग (वान भर्सेज वान) प्रतिस्पर्धा गराइने आयोजकले बताएको छ । 

साथै,प्रतिस्पर्धामा विजेता हुने गोरु, धेरै समयसम्म जुध्ने गोरु,उत्कृष्ट प्रस्तुतिका साथ जुध्ने गोरुलगायतका शीर्षकमा गोरुधनी किसानलाई नगदसहित सम्मान गरिने गाउँपालिकाले जनाएको छ ।