देउवाद्वारा काँग्रेस नेताहरुसँग छुट्टाछुट्टै कुराकानी

नेपाली काँग्रेस सभापति शेरबहादुर देउवाले पार्टी नेताहरुसँग छुट्टाछुट्टै भेटेर कुराकानी गर्नुभएको छ । उहाँले महाराजगञ्ज चक्रपथसँगै रहेको चप्पल कारखानास्थित आफ्नो अस्थायी निवासमा हिजो पाँच मीनेटको अन्तरमा नेताहरुसँग भेटघाट गर्नुभएको थियो ।

हिजो बिहान उहाँले नेताहरु सिन्धुपाल्चोकका मोहनबहादुर बस्नेत,धनकुटाका सुनिलबहादुर थापा, संखुवासभाका दिपक खड्का,पूर्वी नवलपरासीका शशांक कोइरालालगायतसँग बिहान ९ बजेदेखि एक घण्टा बढी सामूहिक कुराकानी गर्नुभएको थियो । छलफलमा सहभागी नेताहरु निस्केपछि उहाँसँग प्रवक्ता डा.प्रकाशशरण महतले भेट गर्नुभयो ।

सभापति देउवा र नेता महतबीच सवा १० बजेदेखि झण्डै डेढ घण्टा छुट्टै वार्तालाप भएको काँग्रेस स्रोतको दाबी छ ।