जिल्लाको आदेश उच्च्द्वारा बदर, सन्दीप लामिछाने थुनामुक्त

बलात्कार आरोपमा कारागारमा रहेका क्रिकेटर सन्दीप लामिछानेलाई पुर्पक्षका लागि थुनामा पठाउने जिल्ला अदालत काठमाडौंको आदेश उच्च अदालतले बदर गरेको छ । उच्चका न्यायाधीशद्वय ध्रुवराज नन्द र रमेश ढकालको संयुक्त इजलासमा जिल्ला अदालतको आदेश बदर गरिदिएको हो । यो आदेशसँगै थुनामा बसेर पुर्पक्ष गरिरहेका लामिछाने अब घर जाने भएका छन् । 

यसअघि लामिछानेले जिल्ला अदालतको आदेशविरुद्ध उच्चमा पुनरावेदन गरेका थिए । वेरितको आदेश बदर माग गर्दै उनको तर्फबाट रिहाइको लागि गरिएको पुनरावेदनमाथिको सुनुवाई पटक-पटक स्थगित भएको थियो ।  

गत कात्तिक १८ गते काठमाडौं जिल्ला अदालतमा दुवै पक्षको बहसपछि सन्दीपलाई थुनामा पठाउन आदेश दिएको थियो । यसअघि बलात्कार आरोपित क्रिकेटर लामिछानेबाट पीडित भनिएकी किशोरीको जन्मसम्बन्धी प्रमाण झिकाउन काठमाडौं जिल्ला अदालतले आदेश दिएको थियो ।

पुस १२ गते मंगलबार न्यायाधीश हिमलाल बेल्बासेको इजलासले पीडित किशोरीको जन्मसम्बन्धी प्रमाण झिकाउने आदेश दिएको छ ।

लामिछानेमाथि नाबालिग (१८ वर्षमुनि) लाई बलात्कार गरेको आरोप छ । तर सन्दीपको पक्षले किशोरी १८ वर्ष मुनिको नभएको भन्दै आएका छन्।  उमेरसम्बन्धी विवाद भएपछि इजलासले उनको जन्मसम्बन्धी अभिलेख अस्पतालबाट झिकाउन आदेश दिएको हो ।

क्रिकेट खेल्न विदेशमा रहेका बेला बलात्कारको आरोप लागेका लामिछाने असोज २० गते नेपाल फर्किने क्रममा त्रिभुवन विमानस्थलबाट पक्राउ परेका थिए ।