लुम्बिनीमा सभामुख र उपसभामुखको चुनाव आउँदो मंगलबार

लुम्बिनी प्रदेश सभा सचिवालयले सभामुख र उपसभामुख पदको निर्वाचन कार्यतालिका सार्वजनिक गरेको छ । ज्येष्ठ सदस्य डिल्लीराज भुसालले निर्वाचनको मिति र समय तोकेका छन् । आउँदो माघ ३ गते मंगलबार दिँउसो १ बजेबाट शुरु हुने प्रदेश सभाको बैठकमा सभामुख र उपसभामुख चयन गरिनेछ । 

शुरुमा सभामुख र त्यसपछि उपसभामुखको चुनावको तयारी गरिएको छ । सचिवालयले सार्वजनिक गरेको कार्यतालिकाअनुसार माघ २ गते १ बजेदेखि ५ बजेसम्म सभामुख र उपसभामुख पदमा निर्वाचित गरियोस् भन्ने छुट्टाछुट्टै प्रस्तावको सूचना दर्ता गर्नुपर्नेछ ।

त्यसरी प्रस्तावित उम्मेदवारहरुको अनुसूची–३ बमोजिमको ढाँचामा मञ्जुरी रहेको निस्सासमेत संलग्न गर्नुपर्नेछ । सोही दिन साढे ५ बजे निर्धारित समयभित्र दर्ता भएका सभामुख र उपसभामुख पदमा प्रस्तावित उम्मेदवारहरुको सूचनाको सूची प्रकाशन गरिने कार्यतालिकामा उल्लेख छ । 

माघ ३ गते लुम्बिनी प्रदेश सभा नियमावली, २०७९ को नियम ७ बमोजिम प्रदेश सभाको बैठकमा क्रमशः सभामुख र उपसभामुख चयनको कार्यसूची छ ।