यातायात 'रित्याएर' भूमिमा पुगेका पोखरेल भ्रष्टाचारमा डामिए

यातायात व्यवस्था कार्यालय,सुकेधाराका निमित्त कार्यालय प्रमुख गणेशप्रसाद पोखरेलमाथि गैरकानूनी सम्पत्ति आर्जन गरी भ्रष्टाचार गरेको आरोपमा मुद्दा परेको छ । अख्तियारले पोखरेलविरुद्ध विशेष अदालतमा मुद्धा हालेको हो । 

१ असार २०४३ मा सेवा प्रवेश गरेका उनीविरुद्ध उजुरी परेपछि अख्तियारले १५ फागुन २०७८ सम्मको सम्पत्ति जाँचबुझ गरेको थियो । पोखरेलले ४ करोड ३७ लाख ८८ हजार ४०२ रुपैँया बराबरको सम्पत्ति जोडेको र जसमध्ये ३ करोड ३१ लाख ५५ हजार ६२ रुपैँयामात्रै कानूनी रुपमा आर्जन गरेको अख्तियारको दावी छ । 

अख्तियारले विशेषमा दर्ता गरेको अभियोगपत्रमा बाँकी स्रोत नखुलेको सम्पत्ति जफत गर्न माग पनि गरेको छ । साथै, पोखरेलकी श्रीमती बिमला न्यौपाने पोखरेललाई पनि मुद्दामा प्रतिवादी बनाइएको छ ।

यातायात कार्यालयका शाखा अधिकृत पोखरेलले पारिश्रमिकबाहेक घरबहाल, बीमा, रेमिट्यान्स, मोटरसाइकल बिक्री, शेयरलगायतबाट सम्पत्ति जोडेको बताउँदै आएका थिए । उनको दाबीलाई स्वीकार गरेर हेर्दा पनि त्यसबाहेक आर्जनको स्रोत नखुलेको अख्तियारको भनाई छ । 

यातायात व्यवस्था कार्यालय सवारीचालक अनुमतिपत्र सुकेधारा चावहिलका तत्कालीन निमित्त कार्यालय प्रमुख उनी हाल राष्ट्रिय भूमि आयोग, ताहाचलमा कार्यरत छन् । पोखरेल शाखा अधिकृतस्तरका कर्मचारी हुन् ।