रवि लामिछानेलाई अमेरिकाबाट प्रश्न‘अमेरिकी स्टोरमा काम गर्दा वर्षको कति दिन छुट्टी पाउनुहुन्थ्यो ?’

हिजो पोखरामा भएको यति एअरलाइन्सको एटिआर विमान दुर्घटनामा यात्रु ६८ र चालक दलका चार गरी सबै ७२ जनाको ज्यान गएको छ । सोही दुर्घटनामा शोक मनाउन हिजो दिउँसो बसेको आकस्मिक क्याबिनेट बैठकले आज मुलुकभर सार्वजनिक बिदा दिने निर्णय गरेको छ ।

गृह मन्त्रालयको प्रस्तावमा क्याबिनेटले बिदा दिएपछि अस्ति शनिवार,हिजो माघी दिवस र आजको शोक बिदा गरेर लगातार तीन दिन बिदा परेको छ । बिदा दिने प्रस्ताव र निर्णय नितान्त गलत भन्दै अमेरिकामा रहेका एक जना पूर्व नेपाली पत्रकारले गृहमन्त्री रवि लामिछानेको उछित्तो काढेका छन् । 

टेक्सासमा सपरिवार बस्दै आएका नुवाकोटका रामचन्द्र भट्टले सामाजिक सञ्जालमा लेखेका छन्, ‘अमेरिका देखेर,अमेरिका टेकेर, अमेरिका भोगेर,अमेरिकाबाट सिकेर नेपाल फर्किएका रवि लामिछानेले केही नयाँपन ल्याउने आशा थियो । लास्टमा उही र उस्तै देखिए ।’

"सब वेको मेनेजर हुँदा कति दिन आफूले छुट्टी लिनुहुन्थ्यो ? फेडरल गभर्मेन्टले वर्षको कति दिन छुट्टी दिन्छ ? सबै भुल्नुभयो ? अमेरिकाले विमान दुर्घटना हुँदा छुट्टी कहिल्यै दिएको थियो ?’

 विमान दुर्घटनामा निधन भएकाप्रति दुःख व्यक्त गर्ने,यस्ता दुर्घटना हुन नदिन नीति,नियम बनाउने र प्रभावकारी कार्यान्वयन गर्नुपर्ने आवश्यकतालाई बिर्सेकोमा भट्टले गृहमन्त्रीलाई सुझाव पनि दिएका छन् । आकाशमा उड्ने जहाज मात्र होइन धर्तीमा गुड्ने बस,माइक्रोबस, ट्रक,जीपको प्राविधिक जाँच र सुरक्षामा ध्यान दिनुपर्ने उनको भनाइ छ । तर सार्वजनिक बिदा दिनु भनेको स्रोतको दुरुपयोग र अरु कुनै क्षमता र बुध्दि नहुनुको प्रमाण भएको भट्टको आरोप छ ।

 उनले लेखेका छन्, ‘ए रविजी,तपाईंले अमेरिकाका स्टोरमा काम गर्दा वर्षको कति दिन छुट्टी पाउनुहुन्थ्यो ? सब वेको मेनेजर हुँदा कति दिन आफूले छुट्टी लिनुहुन्थ्यो ? फेडरल गभर्मेन्टले वर्षको कति दिन छुट्टी दिन्छ ? सबै भुल्नुभयो ? अमेरिकाले विमान दुर्घटना हुँदा छुट्टी कहिल्यै दिएको थियो ?’ भावनामा बगेर बिदा दिँदा कुनै अर्थ नहुने उनको सुझाव छ ।

दुर्घटनापिच्छे सार्वजनिक बिदा दिँदा राज्यले कसरी थेग्न सक्छ ? भन्ने बहस पनि शुरु भएको छ । यसैगरी ठूलो संख्यामा हताहती हुने गरी बस दुर्घटना र यात्रुको निधन भएमा के गर्ने भन्ने नयाँ प्रश्न पनि खडा भएको छ । उनले सोधेका छन्, ‘कि जहाज चढ्नेको मात्र जीवन हो, बस मिनीबस चढ्नेहरु जनता होइनन् ? यस्ता हावादारी निर्णय क्याबिनेटबाट गराएर तपाईंले पनि आफू उही ड्यांगको मुला हुँ भन्ने प्रमाणितै गर्नुभयो ।’ उनले यस्तो घटनामा बिदा दिनुलाई टाउको दुखेको ओखती नाईटोमा दल्नुको उपमा समेत दिएका छन् ।